Qoʻshimcha funksionallar
-
Tungi ko‘rinish
Rossiya va Kiyev delegatsiyalari Jyenevadan uchib ketishdan oldin yana bir bor uchrashdi
Moskva va Kiyev vakillari AQSh ishtirokidagi rasmiy muzokaralar raundidan keyin yakkama-yakka uchrashdi. Qo‘shimcha suhbat deyarli asosiy qismi qancha davom etgan bo‘lsa, shunchaga yaqin vaqt davom etgan.
Rossiya va Ukraina delegatsiyalari Jyenevada, Ukrainadagi urushni to‘xtatish bo‘yicha maslahatlashuvlarning rasmiy qismi yakunlanganidan so‘ng, ikki tomonlama to‘g‘ridan to‘g‘ri muzokaralarning yana bir raundini o‘tkazdi. Rossiya delegatsiyasi rahbari Vladimir Medinskiy chorshanba kuni, 18 fevralda, uchib ketish oldidan Kiyev vakillari bilan yopiq eshiklar ortida uchrashganini tasdiqladi, biroq suhbat mazmunini ochiqlamadi.
Qo‘shimcha uchrashuv bo‘lganini “Suspilne” nashri ham Ukraina delegatsiyasi rahbari — MXK kotibi Rustem Umerovning matbuot kotibi Diana Davityanga tayanib tasdiqladi. Davityanning aytishicha, taxminan bir yarim soat davom etgan uchrashuvda Umerov va Medinskiy, shuningdek, Oliy radadagi “Xalq xizmatkori” fraksiyasi rahbari David Araxamiya ishtirok etgan. Nashr muxbirining aytishicha, u InterContinental mehmonxonasi oldida uchrashuvdan chiqib ketayotgan Medinskiyni uchratgan.
O‘z navbatida, Ukraina prezidentining kommunikatsiyalar bo‘yicha maslahatchisi Dmitriy Litvin jurnalistlarga Ukraina vakillarining Medinskiy bilan uchrashuvini “albatta qandaydir alohida format deb hisoblash kerak emas”, dedi. Uning tushuntirishicha, “aynan shu odam” qo‘shimcha uchrashish istagini bildirgan, oldin muhokama qilingan masalalar bo‘yicha ayrim aniqlashtiruvlar berilgan, xolos. “Hech qanday alohida narsa yo‘q. Delegatsiya natijalar bo‘yicha Kiyevda prezidentga barcha tafsilotlarni taqdim etadi va bu haqda xabar beramiz”, — dedi Litvin.
Uning so‘zlariga ko‘ra, Rossiya delegatsiyasi rahbari Ukraina vakillariga murojaat qilgan paytda Ukraina delegatsiyasining bir qismi allaqachon ketib bo‘lgan. Shundan keyin Medinskiy bilan Umerov va Araxamiya gaplashishiga qaror qilingan. “Bu rejalashtirilmagan edi, va oxir-oqibat bunda mazmunan hech narsa bo‘lmadi. Iltimos, Medinskiydan u bo‘lmagan kimsani yasab yubormang — go‘yo u qandaydir maxsus yoki parallel narsa qilayotgandek”, — deya ta’kidladi Zelenskiy maslahatchisi.
Bundan oldin, AQSh vositachiligida o‘tgan ikki kunlik muzokaralar yakunlari bo‘yicha Rossiya va Ukraina delegatsiyalari jiddiy yutuqqa erishmagan. Medinskiy muzokaralar “og‘ir, ammo ishchan” bo‘lganini aytgan. Umerov esa ayrim masalalarga oydinlik kiritilganini bildirgan, biroq “bu bosqichda tafsilotlarni oshkor qilib bo‘lmaydi”, deb qayd etgan. U, shuningdek, Rossiya tomoni bilan muhokamalarni “intensiv va mazmunli” deb atagan.
