Britaniya politsiyasi qirol Charlz III ning ukasi – sobiq shahzoda Endryu Mauntbetten-Vindzorni qo‘lga oldi. U mansabidan foydalanib, jinoyat sodir etishda gumonlanmoqda. Politsiya u Buyuk Britaniyaning xalqaro savdo va investitsiyalar bo‘yicha maxsus vakili bo‘lib ishlaganida do‘sti, amerikalik moliyachi va odam savdosida ayblangan jinoyatchi Jyeffri Epshteynga maxfiy ma’lumotlarni bergani haqidagi xabarlarni tekshirmoqda, deb yozadi BBC va The Guardian.
Endryu o‘zining tug‘ilgan kunida qo‘lga olindi – 19 fevral kuni u 66 yoshga to‘lgandi. Qirol Charlz III ukasiga nisbatan surishtiruv ishlarini ma’qullagan. «Aniq qilib aytishga ruxsat bering: qonun tantana qilishi kerak», – degan u va endi huquq-tartibot organlari puxta va adolatli surishtiruv jarayoni o‘tkazishi kerakligi, bunda qirollik xonadoni ularga «har tomonlama yordam ko‘rsatishi»ni qo‘shimcha qilgan.
Peter Nicholls / Getty Images
Endryu qariyb 400 yil ichida Britaniya monarxiyasining hibsga olingan ilk vakili bo‘ldi. The Guardian nashri yozishicha, bundan oldingisi Angliya qiroli Charlz I bo‘lgandi, u 1647 yilda fuqarolik urushi davrida asirga tushgan va xiyonatda ayblanib, qatl etilgandi. Britaniya tojining jinoiy harakat uchun ayblangan oldingi vakili Endryuning singlisi, malika Anna bo‘lgandi. U 2002 yilda iti Vindzorda ikki bolani tishlab olgani uchun 500 funt miqdorida jarimaga tortilgandi. Shu bilan birga, Anna bu ish doirasida qo‘lga olinmagan.
Endryu ko‘p yillar davomida Jyeffri Epshteyn bilan yaqin aloqada bo‘lgan. Ular 1990-yillarda tanishishgan va 2008 yilda Epshteyn o‘smir yoshdagi qizlarni zo‘rlashda ayblanib, qamalganidan keyin ham u bilan aloqalarni saqlab qolgan. Epshteyn Endryuning sobiq rafiqasi Sara Fergyusonga (balki uning o‘ziga ham) puldan yordam qilgani haqida ma’lumotlar bor. Buning evaziga Endryu Epshteynga «hurmatga sazovor bo‘lish, siyosiy yetakchilar va biznes davralariga kirish»ni ta’minladi, deydi Endryuning norasmiy tarjimayi holi muallifi yozuvchi Endryu Louni.
