Rossiyada Leonardo chipta tizimi operatori milliylashtirildi

Rossiyada sud aviachiptalarni bron qilish tizimi Leonardo operatori bo‘lgan «Sirena-trevel» guruhi aktivlarini davlat foydasiga o‘tkazdi. Ularning qiymati 35 mlrd rubldan ortiq. Kompaniya davlat mulkidan noqonuniy foydalanish bilan bog‘langan.

Foto: Valery Sharifulin/TASS/dpa/picture alliance

Moskva shahrining Nikulin tuman sudi 20 fevral, juma kuni «Sirena-trevel» kompaniyalar guruhini — Rossiyadagi deyarli barcha yirik aviatashuvchilar foydalanadigan Leonardo aviachipta bron qilish tizimi operatorini milliylashtirish haqida qaror chiqardi. Da’voni Rossiya Bosh prokuraturasi kiritgan. Sud majlisi matbuotdan yopiq tarzda o‘tgan.

Nazorat idorasi ma’lum qilishicha, LDPR fraksiyasidan Davlat dumasi deputati Rifat Shayxutdinov, «Sirena-trevel» asoschisi sifatida, avval o‘zi rahbarlik qilgan davlat korxonasi aktivlari negizida biznes tuzgan. Tergov versiyasiga ko‘ra, bu ish noqonuniy amalga oshirilgan. Shayxutdinovning biznes hamkori — milliarder Ibragim Suleymanov hozirda tergov ostida.

Musodara qilingan mulkning umumiy qiymati 35 mlrd rubldan oshadi. «Sirena»ning o‘ziga qo‘shimcha ravishda davlat ixtiyoriga Sankt-Peterburgdagi «Novotel» va «Valo» mehmonxonalari, oltita turistik kompaniya, shuningdek kottejlar, kvartiralar va yer uchastkalari ham o‘tgan.

«Sirena-trevel» faqat Leonardo chipta sotish tizimini emas, balki ko‘plab Rossiya aeroportlarida ishlaydigan yo‘lovchi va bagajni ro‘yxatdan o‘tkazish platformasi — «Astra»ni ham nazorat qiladi. Amalda bu mamlakat fuqarolik aviatsiyasi infratuzilmasining muhim tarkibiy qismi hisoblanadi.

Kompaniya bir necha bor hakerlar hujumlarining nishoni bo‘lgan: ular «Sirena»ning o‘ziga ham, Leonardo tizimiga ham hujum qilgan.