Daraxtlarni sovuq uradimi?

Fevral bizni quyoshli kunlar bilar siyladi. Biroq hamma biladi, bunaqa sovg‘aning ikkinchi tomoni bor: bu faslning quyoshli kunlaridan keyin sovuq tushsa uyg‘onib ulgurgan nabototni sovuq uradi. Xo‘sh, bu yil qanday bo‘ladi? Iqlimshunos Erkin Abdulahatov yaqin o‘n kunlikdagi ob-havo kutilmalarini Kun.uz'ning jonli efirida tanishtiradi.  

Oy oxirlariga borib, Navoiy, Buxoro viloyatlari hamda ko‘plab tog‘ oldi hududlarida mavsum uchun ilk sovuq urish hodisalari kuzatilishi mumkin. Joriy haftaning chorshanba kuni hududlarda havo harorati +15...+20 daraja, janubiy viloyatlarda +25 darajagacha ko‘tarilishi kutilmoqda. Dam olish kunlariga borib hududlarda havo haroratining sezilarli pasayishi kutiladi. 

Fevral davomida kuzatilgan yuqori havo harorati dov-daraxtlar uchun o‘sish davrining har qachongidan ancha erta, ayrim viloyatlarda bir oycha oldin bo‘lishini ta’minladi. 

Fevral oyidagi bu kabi aldamchi bahor azaldan qishloq xo‘jaligi tarmoqlari uchun sovuq urish hodisalarini keltirib chiqargan, yil hosiliga ta’sir etib kelgan. Joriy yilda ham shunga yaqin holat kuzatilishi mumkin. Ammo bu hududlar uchun bir xil emas, ayrim viloyatlarda mart oyi boshlaridagi sovuqlik to‘lqini qishloq xo‘jalik tarmoqlariga katta xavf tug‘dirmaydi.

Jahon meteorologik tashkiloti O‘zbekistonda joriy bahor mavsusmini harorat kesimida ancha issiq, yog‘ingarchilik kesimida esa sezilarli quruq o‘tishi bilan bog‘liq mavsumiy prognozini taqdim etdi.