Zelenskiy: Rossiya va AQSh bilan uchrashuv boshqa joyga ko‘chirilishi mumkin

Ukraina prezidenti Volodimir Zelenskiy 2 mart kuni jurnalistlar bilan muloqotda 5–8 mart kunlariga Abu-Dabida rejalashtirilgan uch tomonlama muzokaralar hozircha bekor qilinmaganini aytdi. Uning so‘zlariga ko‘ra, Yaqin Sharqdagi harbiy harakatlar va BAA havo hududining yopilishi sabab uchrashuv aynan Abu-Dabida o‘tishini tasdiqlab bo‘lmayapti.

“Uchrashuv 5–8 mart oralig‘ida, taxminan 5–6 mart kunlari Abu-Dabida rejalashtirilgan edi. Hozir jangovar harakatlar tufayli uning aynan shu yerda bo‘lishini tasdiqlay olmaymiz. Biroq hech kim uchrashuvni bekor qilgani yo‘q”, — dedi Zelenskiy.

U ehtimoliy maydonlar sifatida Turkiya va Shveytsariyani sanab o‘tdi. “Biz bu maydonlarning har qaysisini qo‘llab-quvvatlaymiz. Uchrashuv bo‘lishi kerak, u biz uchun muhim. Nafaqat uchrashuvning o‘zi, balki natijalar va almashinuv masalasi ham muhim”, — deya ta’kidladi u. Ukraina tomoni hozir sheriklardan muzokara o‘tkaziladigan joy bo‘yicha javob kutmoqda.

Bloomberg agentligi manbasiga ko‘ra, BAA havo hududi raketalar va dron hujumlari xavfi sabab yopilgani uchun muzokaralar Abu-Dabida o‘tishi ehtimoli past. Muqobil variant sifatida Istanbul ko‘rib chiqilmoqda.

Yanvar oxiri – fevral boshida 2022 yil fevralda boshlangan keng ko‘lamli urushdan beri ilk bor uch tomonlama muzokaralar Abu-Dabida o‘tgan edi. Fevral o‘rtalarida shu formatdagi uchrashuv Jyenevada o‘tkazilgan. Istanbulda esa Rossiya va Ukraina o‘rtasida AQSh ishtirokisiz muzokaralar oxirgi marta 2025 yil iyul oyi oxirida tashkillashtirilgan.

AQSh va Isroilning Eronga qarshi harbiy amaliyoti esa davom etmoqda. 28 fevral kuni Isroil va AQSh Eron hududiga zarbalar bergan. AQSh prezidenti Donald Tramp Eronning yadroviy dasturini yo‘q qilish niyatida ekanini bildirgan va mojaro “taxminan to‘rt hafta” davom etishi mumkinligini aytgan.

Eron Qizil Yarim Oy jamiyati ma’lumotiga ko‘ra, zarbalar natijasida kamida 555 kishi halok bo‘lgan. Ayni paytda Ali Xominaiy va bir qator yuqori lavozimli kuch tuzilmalari vakillari halok bo‘lgani tasdiqlangan.

Tehron esa AQSh bilan muzokaralardan bosh tortganini ma’lum qilib, Isroil va mintaqaning boshqa davlatlari hududiga zarbalar bergan. Shuningdek, Eron droni Kiprdagi Britaniya aviabazasiga hujum qilgani ma’lum bo‘ldi.