Ispaniya AQShning harbiy hamkorlik haqidagi bayonotlarini rad etdi

Ispaniya AQShning “Madrid Vashington bosimiga bo‘yin egib, Eronga zarba berish uchun o‘z harbiy bazalarini taqdim etishga rozi bo‘ldi” degan bayonotlarini rad etdi. Ispaniya hukumati pozitsiyasi o‘zgarmagan, dedi 4 mart, chorshanba kuni Cadena SER radiostansiyasi efirida Ispaniya tashqi ishlar vaziri Xose Manuel Albares. Shu kunning o‘zida Oq uy matbuot kotibi Kerolayn Livitt Ispaniya amerikalik harbiylar bilan harbiy hamkorlikka rozi bo‘lganini ma’lum qilgan edi. “Menimcha, ular kecha prezidentning xabarini aniq va ravshan eshitdi”, — dedi Livitt. U bu gapi bilan Donald Trampning Madrid bilan savdo munosabatlarini uzishi mumkinligi haqidagi tahdidini nazarda tutgan.

Albaresning aytishicha, Ispaniyaning AQSh bilan “harbiy tarzda hamkorlik qilishga” tayyorligi haqidagi xabarlar “qat’iy ravishda haqiqatga to‘g‘ri kelmaydi”. El País gazetasi yozishicha, bosh vazir Pedro Sanches avvalroq Ispaniyaning mojarodagi pozitsiyasini “ikki so‘z bilan — urushga yo‘q” deya ta’riflagan.

Ispaniya NATOda AQSh va Isroilning Eronga qarshi harbiy operatsiyasiga ochiqdan ochiq qarshi chiqqan yagona davlatga aylandi. Ispaniya bazalari atrofidagi tortishuv Madrid bilan Vashington o‘rtasida mudofaa xarajatlari miqdori masalasida kengroq qarama-qarshilik kuchaygan bir paytda yuzaga kelmoqda. Ispaniya NATOda 2035 yilga qadar harbiy xarajatlarni YaIMning 5 foizigacha oshirishdan bosh tortgan yagona davlat bo‘lib qolmoqda. Yevroittifoq AQShning ehtimoliy savdo sanksiyalaridan Ispaniyani himoya qilishga tayyor ekanini bildirdi.

AQSh va Isroil 28 fevral kuni ertalab Eron hududiga zarbalar bera boshladi. AQSh prezidenti Donald Tramp Islom Respublikasining yadroviy dasturini yo‘q qilish niyati borligini aytdi va Eron armiyasini qurol tashlashga, mamlakat aholisini esa “taqdirini o‘z qo‘liga olishga” chaqirdi.

Eronda zarbalar oqibatida kamida 787 kishi halok bo‘lgan, deb 3 mart kuni davlat ommaviy axborot vositalari Eron Qizil Yarim Oy jamiyati ma’lumotlariga tayanib xabar berdi. Eron javoban Isroilga va Fors ko‘rfazining bir qator davlatlariga zarba berdi, u yerda ham halok bo‘lganlar bor. Tehron arab davlatlari bilan urishmayotganini, balki mintaqadagi AQSh harbiy bazalariga zarba berayotganini ta’kidlamoqda.