Zelenskiy Orbanning manzilini Ukraina qurolli kuchlariga berish bilan tahdid qildi

Ukraina prezidenti Volodimir Zelenskiy agar «Yevroittifoqdagi bir kishi» Kiyevga Yevropa yordamini to‘sishda davom etsa, uning manzilini Ukraina qurolli kuchlariga berishi haqida aytdi. Zelenskiy nutqining videosi 5 mart, payshanba kuni Telegram’da joylandi.

Zelenskiy Vengriya bosh vaziri Viktor Orbanning ismini to‘g‘ridan to‘g‘ri tilga olmadi. Uning ismi agentlikning kirish qismida keltirilgan. «Yevroittifoqdagi bir kishi 90 milliardni yoki 90 milliardning birinchi transhini to‘smaydi, deb umid qilamiz, shunda ukrain harbiylarida qurol bo‘ladi. Aks holda — bu odamning manzilini qurolli kuchlarimizga beramiz, ular unga qo‘ng‘iroq qilib, u bilan o‘z tilida gaplashsin», — deydi Ukraina yetakchisi. «Biz bu pullarga muqobil yo‘qligini tushunyapmiz», — deya qo‘shimcha qiladi u.

Volodimir Zelenskiyning so‘zlariga ko‘ra, Ukraina Bryussel kutayotgan texnik yechimlar tayyor bo‘ladigan sanani Yevropa Ittifoqiga allaqachon aytgan. Bu masala 19 mart kuni bo‘lib o‘tadigan Yevropa kengashi yig‘ilishida ko‘rib chiqilishi kerak. Agentlik yozishicha, Kiyev ijobiy qarorga umid qilmoqda.

Vengriya 20 fevraldan buyon Ukraina uchun Yevropa Ittifoqi yordamini to‘sib kelmoqda. Gap 90 milliard yevro miqdoridagi kredit haqida ketmoqda, shundan 60 milliard yevrosi bevosita Ukrainaning mudofaa ehtiyojlari uchun mo‘ljallangan. Germaniya tashqi ishlar vaziri Yoxann Vadefulning aytishicha, bu kreditga nafaqat Kiyevning mudofaa qobiliyati, balki Yevropadagi tinchlik ham bog‘liq.

Vengriya o‘z vetosini shunday izohlamoqda: Ukraina hududi orqali o‘tadigan “Drujba” neft quvuriga Rossiya zarbasidan keyin u endi Rossiya neftini olmayapti, chunki Kiyev go‘yoki ta’mirlash ishlarini amalga oshirmayapti. Volodimir Zelenskiy o‘tgan hafta Budapesht tanqidiga javoban, Rossiya neftining Yevropa bozorida o‘rni yo‘qligini aytgan edi.

Vengriya tashqi ishlar vaziri Peter Siyyartoning so‘zlariga ko‘ra, Budapesht «Vengriyaga “Drujba” quvuri orqali neft tranziti qayta tiklanmaguncha» o‘z pozitsiyasini o‘zgartirmaydi.