BioNTech asoschilari boshqa kompaniyaga o‘tishini e’lon qildi

Germaniyaning vaksina ishlab chiqaruvchi BioNTech kompaniyasi asoschilari Ugur Shohin va O‘zlem Turechi kompaniyadagi rahbarlik lavozimlarini tark etishini ma’lum qildi. BioNTech/Pfizer vaksinasi yaratuvchilari sifatida tanilgan immunolog er-xotin mRNK tadqiqotlariga qaytishni xohlamoqda va shu maqsadda yangi korxona tashkil etadi, deb yozdi 10 mart, seshanba kuni Reuters agentligi.

Shohinning so‘zlariga ko‘ra, yangi kompaniya tuzishga juftlikning “yana ixtirochi bo‘lish” istagi turtki bo‘lgan. Kutilishicha, yangi korxona mRNKni qo‘llash sohasidagi tadqiqotlar bilan shug‘ullanadi. Bu texnologiya onkologik kasalliklarga qarshi kurashishning ehtimoliy usullaridan biri sifatida qaralmoqda.

“Biz shuni angladikki, BioNTech’ning klinik ishlanmalarning kechki bosqichlariga qaratilayotgan diqqati menga ham, O‘zlem Turechiga ham ilk bosqichdagi tadqiqotlarga yetarlicha vaqt qoldirmadi, — deya Reuters Shohinning so‘zlarini keltiradi. — Juda katta salohiyat mavjud va biz uni BioNTech hamda yangi kompaniya doirasida parallel ravishda ochib berish niyatidamiz”.

Shohin va Turechi yil oxiriga qadar BioNTech’da qoladi, biroq shu bilan bir vaqtda o‘zi uchun hisob bo‘yicha uchinchi kompaniyani ham tashkil qiladi. Shu bilan birga, BioNTech yangi firmaga ozchilik ulushi evaziga ayrim patent huquqlarini taqdim etadi.

“Biz ularning yangi kompaniyasi bilan kombinirlangan terapiyaga oid ehtimoliy yondashuvlar bo‘yicha hamkorlik qilishni intiqlik bilan kutyapmiz”, — deya yangilikka izoh berdi BioNTech boshqaruvi raisi Xelmut Yyeggl.

Shohin BioNTech’da bosh direktor lavozimida, Turechi esa kompaniyaning tibbiy tadqiqotlar bo‘yicha direktori lavozimida ishlab kelgan. Ularning kompaniyadan ketishi rejalashtirilgani va 2026 yilda BioNTech tushumi qisqarishi haqidagi xabarlar ortidan farmatsevtika korxonasi aksiyalari qiymati taxminan 17 foizga tushdi.

Maynslik immunolog er-xotin 2020 yilda, COVID-19 pandemiyasi davrida butun dunyoga mashhur bo‘ldi. Aynan BioNTech ishlab chiqqan vaksina g‘arb mamlakatlarida virusga qarshi kurash uchun ma’qullangan birinchi vaksina bo‘ldi.

Vaksina ishlab chiqilishi dunyoning eng yirik beshta farmatsevtika gigantidan biri bo‘lgan Amerikaning Pfizer korporatsiyasi bilan hamkorlikda amalga oshirilgan. OAV avvalroq xabar berishicha, BioNTech formulani taqdim etgan, amerikaliklar esa vaksina sinovlarining uchinchi bosqichini tashkil qilgan, uni ro‘yxatdan o‘tkazishga yordam bergan va ishlab chiqarish quvvatlarini ta’minlagan.

Shundan keyin BioNTech kompaniyasining faqat 2021 yilning dastlabki to‘qqiz oyidagi sof foydasi 7,1 milliard yevroga yetdi. Korxona joylashgan Mayns shahri soliq tushumlari hisobiga 1980-yillardan beri to‘planib kelayotgan qarzlarining bir qismini uzishga muvaffaq bo‘ldi. Juftlik esa Germaniyaning eng boy insonlari orasidagi maqomini mustahkamlashdan tashqari, ko‘plab mukofotlarga, jumladan Germaniyaning eng yuqori mukofoti bo‘lgan “Xizmatlari uchun orden”ga ham sazovor bo‘ldi.