Isroil Ali Larijoniy o‘ldirilganini ma’lum qildi

Isroil mudofaa armiyasi 17 martga o‘tar kechasi Eron Xavfsizlik kengashi kotibi Ali Larijoniyga zarba bergan. Bu haqda dastlab Times of Israel TSAHAL bayonotiga asoslanib xabar tarqatdi. 

Ko‘p o‘tmay Isroil mudofaa vaziri Israel Kats «Eronning amaldagi rahbari» Ali Larijoniy zarba oqibatida halok bo‘lganini tasdiqladi.

Eron hukumati hozircha bu ma’lumot yuzasidan izoh bermayapti.

«12 kanal» telekanalining Isroil xavfsizlik xizmatidagi manbasiga ko‘ra, 16 mart kuni Larijoniy Tehrondagi maxfiy kvartiralaridan biriga kelgani haqida ma’lumot kelib tushgan. Isroil zarbasi vaqtida kvartirada u o‘g‘li bilan birga bo‘lgan. 

«Unda bunday zarbadan keyin omon qolish imkoni yo‘q edi», – degan telekanal manbasi.

Isroil harbiylari Tehronda yana bir «aniq zarba» natijasida ko‘ngillilarning «Basij» nomli harbiylashgan tuzilmasi qo‘mondoni G‘ulomrizo Sulaymoniy ham halok bo‘lgani haqida xabar bergan. «Basij» Islom inqilobi muhofizlari korpusi tarkibiga kiradi va Eronda hukumatga qarshi ko‘tarilgan namoyishlarni bostirish bilan ham shug‘ullangan.

Ali Larijoniy – AQSh va Isroilning Eron bo‘ylab yo‘llagan dastlabki zarbalari oqibatida halok bo‘lgan Ali Xominaiyning o‘ng qo‘li hisoblangan, uning o‘limidan keyin esa mamlakatdagi asosiy shaxslardan biri edi.

2025 yil avgustida Eron prezidenti Mas’ud Pizishkiyon Larijoniyni Eron Milliy xavfsizlik kengashi kotibi va oliy rahbarning kengashdagi vakili lavozimiga tayinlagandi. Eron nashrlarida u Xominaiyning maslahatchisi sifatida ham keltirilgan.

U 2008 yildan 2020 yilgacha Eron parlamenti spikeri lavozimida ham ishlagan. Parlament spikeri bo‘lishidan oldinroq, 2005-2007 yillada Eronning yadroviy dastur bo‘yicha bosh muzokarachisi bo‘lgan.

Uning akasi Sodiq Larijoniy ham Erondagi muhim figuralardan sanaladi. U Fiqh kengashini boshqaradi, bu tuzilma parlament va Konstitutsiyani muhofaza qilish o‘rtasidagi hakamlik vazifasini bajaradi.

Ali Larijoniy Eronda Ali Xominaiy halokatidan keyin o‘ldirilgan eng yuqori martabali mulozim bo‘lmoqda. The New York Times AQSh va Isroil hujumi boshlanishidan oldin mamlakatda amaldagi hokimiyat aynan Ali Larijoniyning qo‘liga o‘tgani haqida yozgandi, Ali Xominaiy yanvarda unga namoyishlarni bostirish va urushga tayyorgarlik ko‘rish topshirig‘ini bergandi. Tehronning asosiy ittifoqchilari – Rossiya, Qatar va O‘mon bilan aloqalar ham u orqali olib borilgan, u shuningdek, Eron yadroviy dasturi bo‘yicha AQSh bilan o‘tkazilgan muzokaralarni nazorat qilgan.

CNN xabariga ko‘ra, Isroil harbiy amaldorlaridan biri brifingda aynan Larijoniy Isroil va Fors ko‘rfazidagi arab davlatlariga qarshi hujumlarga rahbarlik qilganini aytgan.

«Bu rejimning imkoniyatlariga jiddiy zarba va uning Isroil va o‘z xalqiga qarshi urush olib borish qobiliyatiga jiddiy zarba. Va biz Eron rejimining imkoniyatlarini zaiflashtirishga erishishda davom etamiz», – degan u.