Rossiyada Telegram amalda ishlamay qoldi

Rossiyada hatto VPN qo‘llanganda ham Telegram messenjerining barcha versiyalari ishida keng ko‘lamli muammolar kuzatilayotgani xabar qilinmoqda. Rossiyalik jurnalistlar fikricha, hokimiyat Telegram’ni to‘liq bloklashni boshlagan bo‘lishi mumkin.

Foto: D. Umbrasasa / LRT

Rossiyada Telegram ishida keng ko‘lamli uzilishlar haqida xabar berilmoqda. Rossiya OAV 16 mart, dushanba kuni RFning turli hududlari, jumladan Moskva va Sankt-Peterburgdan kelgan foydalanuvchilar shikoyatlariga tayanib yozishicha, messenjer deyarli ishlamay qolgan — hatto VPN ishlatilganda ham uning mobil, desktop va veb versiyalari turli ko‘rinishlarda to‘g‘ri ishlamayapti.

«Kommersant» nashri suhbatlashgan ekspertlarga tayanib qayd etishicha, Rossiyada so‘nggi haftalarda ogohlantirilgan Telegram blokirovkasi allaqachon boshlangan.

«So‘nggi bir sutkada Telegram uy provayderlari orqali, agar Rossiya IP-manzillari orqali ulanish haqida gapirayotgan bo‘lsak, amalda ishlamayapti. Telegram’ning mobil internet orqali ishlashi haqida unutish mumkin. Agar qaysidir shaharda faqat “oq ro‘yxat”dagi saytlar faol bo‘lsa, u holda ko‘pchilik VPN-servislar ham Telegram’ga kirishga yordam bermaydi», — dedi «Kommersant»ga «Kod Durova» internet nashri eksperti Vladislav Voytenko.

Aloqa operatorlari assotsiatsiyasi MAKATeL prezidenti Aleksey Amelkin ham Telegram bilan bog‘liq muammolarni tasdiqladi.

«Sekinlashtirish anchadan beri bor edi, lekin kecha Telegram’ning Desktop-versiyasi ishlamay qolgani haqida shikoyatlar paydo bo‘ldi. Hozircha operatorlar bo‘yicha statistika kam va aniq emas, chunki odamlar VPN ishlatyapti, shuning uchun messenjer ishlayaptimi yoki yo‘qmi, aniq aytish qiyin. Testlar shuni ko‘rsatmoqdaki, ehtimol, hammasi aloqa tarmog‘iga — uyali yoki statsionar tarmoqqa — shuningdek hududga va hatto joyning o‘ziga bog‘liq. Davlat organlari turli hududlarda turlicha shartlarni qo‘llayapti, ehtimol, bu sinov uchun bo‘lishi mumkin. Shuning uchun yagona holat yo‘q», — dedi u.

O‘tgan dam olish kunlari Downdetector va sboy.rf saytlarida Telegram’ning turli versiyalari ishi bo‘yicha turli hududlardan kelgan shikoyatlar soni yana oshdi. Shikoyatlarning katta qismi Moskva, Sankt-Peterburg va Moskva viloyatidan tushgan.

Shu bilan birga, Moskva Taganskiy tuman sudi 16 mart kuni Rossiyada taqiqlangan deb e’lon qilingan kontentni o‘chirishdan bosh tortgani uchun Telegram’ni 35 million rubl jarimaga tortdi. TASS axborot agentligi xabar berishicha, gap «ekstremizm»ga chaqiriqlar, voyaga yetmaganlar ishtirokidagi pornografik materiallar, shuningdek giyohvand moddalarni tayyorlash va xarid qilish usullari haqidagi axborot haqida bormoqda.