Футбол бўйича Испания миллий жамоаси (Европа чемпиони) ва Аргентина миллий жамоаси (Америка Кубоги соҳиби) ўртасидаги «Финалиссима» чемпионлик ўйини расман бекор қилинди. Баҳс 2026 йил 27 март куни Қатарда бўлиб ўтиши керак эди, бироқ Яқин Шарқдаги вазият кескинлашиши фонида ўйин ўтказилмайдиган бўлди.
Манбаларга кўра, асосий сабаб минтақавий беқарорлик билан боғлиқ хавфсизликка таҳдидлар, шунингдек, авиақатновлар ва оммавий тадбирларни ўтказишга қўйилган чекловлар бўлган.
Ташкилотчилар – УЕФА ва КОНМЕБОЛ ўйинни ўтказишнинг муқобил вариантларини, жумладан, Европага кўчириш ва икки ўйиндан иборат форматни кўриб чиқди. Бироқ томонлар келишувга эришолмади, жумладан, Аргентина федерациясининг позицияси туфайли.
Шу тариқа, узоқ кутилган чемпионлар тўқнашуви ўтказилмайдиган бўлди. Финалиссиманинг бошқа санага кўчирилиши масаласи очиқ қолмоқда.
