Eron AQShning F-35 qiruvchisi nishonga olinganini ma’lum qildi

AQSh Harbiy-havo kuchlariga qarashli F-35 qiruvchisi Eron havo mudofaasi tomonidan nishonga olingani haqida mahalliy davlat OAV 19 mart, payshanba kuni Islom inqilobi muhofizlari korpusi (IIMK)ga tayanib xabar berdi. AQSh Markaziy qo‘mondonligi (CENTCOM) vakili Tim Xokins samolyot favqulodda qo‘nishni amalga oshirganini tasdiqladi.

“Bort xavfsiz qo‘ndi, uchuvchining ahvoli barqaror”, — dedi u. Bu bayonotni CNN telekanali ikki manbaga tayanib birinchi bo‘lib xabar qilgan. Xokinsning aniqlik kiritishicha, qiruvchi Eron osmonidagi missiyani bajarib bo‘lganidan keyin qo‘nishni amalga oshirgan, ammo bunga nima sabab bo‘lganini ochiqlamagan.

Mart oyi boshida Kuvayt osmonida bir necha Amerika qiruvchi samolyoti halokatga uchradi. Amerika harbiylari uchta F-15E samolyoti mamlakat havo mudofaasi tomonidan yanglish ravishda urib tushirilganini ma’lum qildi. CENTCOM o‘sha kuni barcha olti nafar ekipaj a’zosi muvaffaqiyatli katapulta qilgani va hodisadan keyin ahvoli barqaror ekanini qo‘shimcha qildi. Shuningdek, hodisa sabablari hali o‘rganilayotganini va “qo‘shimcha ma’lumot paydo bo‘lishi bilan” e’lon qilinishiga va’da berdi.

Keyinroq The Washington Post (WSJ) gazetasi hodisa bo‘yicha dastlabki hisobotlar bilan tanish manbalarga tayanib, AQShning F-15E samolyotini Kuvayt qiruvchisi urib tushirgan bo‘lishi mumkinligini yozdi.