Ijtimoiy tarmoqlarda vodiyning ayrim tumanlarida qoramollar ommaviy kasallanayotgani haqida mish-mish tarqaldi. Veterinariya boshqarmasiga ko‘ra, kuzatilayotgan kasallik chorvadorlar aytayotganidek oqsil (yashur) emas, balki qoramol stomatiti bo‘lib, havo harorati ko‘tarilishi bilan o‘tib ketadi.
Kun.uz muxbiri chorvasi kasallikka chalingan bir nechta xonadonda bo‘lib, rasmiylar bilan suhbatlashdi.
Ma’lumotlarga ko‘ra, chorvalarni holdan toydirgan kasallik bir necha oy avval boshlangan va bu qo‘shni tumanlarga ham tarqala boshlagan.
Kasallikka chalingan qoramollar holatini o‘rganish jarayonida chorva egalaridan ma’lumot olishning imkoni bo‘lmadi. Aniqrog‘i, ular negadir bu haqda gapirishni xohlamadi.
Veterinariya boshqarmasi mutaxassislari esa kuzatilayotgan kasallik odamlar aytayotgan yashur (oqsil) emas, balki qoramol stomatiti ekanini ma’lum qildi.
“Vahimaga o‘rin yo‘q”
Farg‘ona viloyati veterinariya boshqarmasi virusologiya laboratoriyasi mudiri Asqarali G‘oziyev:
— Oqsil kasalligi aksariyat juft tuyoqli hayvonlarda, ya’ni ko‘proq qoramollarda, qo‘y, echki va ohularda kuzatiladi. Kasallik qo‘zg‘atuvchi virus haqiqatan ham juda tez tarqaladi. Asosiy klinik belgilariga keladigan bo‘lsak, albatta, hayvonlarda birinchi navbatda og‘zida, shilliq pardalarida, tillarida, milklarida yaralar hosil bo‘lishi bilan, sigirlarning yelinlari og‘rishi bilan va ayrim holatlarda tuyoqlarining orasida yaralar paydo bo‘lish bilan xarakterlanadi.
Lekin biz ko‘rgan holatlarda oqsil kasalligining alomatlari ko‘rinmayapti. Chunki mana, bir xonadonda, mana shu joyning o‘zida ham qo‘ylar, ham echkilar, ham qoramollar turibdi, klinik belgilari ko‘rildi, hech qanday bu aytilgan kasallikning alomatlari kuzatilmadi. Bir tomonda og‘zidan ko‘pik oqayotgan sigir turibdi, bir tomonda esa qo‘ylar. Qo‘ylarga kasallik tegmagan. Agar tarqagan kasallik haqiqatan ham yashur bo‘lganida, qo‘ylar ham kasallangan bo‘lardi.
Bahorga kelib chorvalarda ozuqa yetishmasligi sababli avitaminoz hosil bo‘ladi. Natijada chorvalarning og‘iz bo‘shlig‘i, tili, milklari shilinib, yaralanish paydo bo‘ladi. Buni oddiy tilda stomatit desa ham bo‘ladi.
