Yaqin Sharqdagi so‘nggi voqealar: Isroil harbiy-dengiz konserniga zarba berdi, husiychilar yana raketa uchirdi

Shanba kuni kechqurun CNN telekanali va Times of Israel gazetasi husiychilar Isroil bo‘ylab ikkinchi raketani uchirgani va urib tushirilgani haqida xabar berdi.

Nashrlarga ko‘ra, bu safargisi qanotli raketa bo‘lgan. Husiychilar shanbaga o‘tar kechasi ballistik raketa ham uchirgandi.

Bundan tashqari, husiychilar Isroil bo‘ylab dronlar ham uchirmoqda: Times of Israel va Channel 12 telekanali havo hujumidan mudofaa kuchlari Qizil dengizdagi Eylat portida va kurortda Yamandan uchirilgan dronlar hujumini qaytargani to‘g‘risida xabar bergan.

Shanba kuni ertalab husiychilar vakili guruh Isroil bo‘ylab ballistik raketalar guruhini uchirgani va «muhim harbiy obektlar aniq nishonga olingani», Isroilga qarshi amaliyot «tajovuz yakunlanmagunicha butun qarshilik fronti bo‘ylab» davom etishini ma’lum qildi.

Dengiz konserni bo‘ylab zarba

Shanba kuni Tehronda yana kuchli portlashlar ro‘y berdi.

Isroil mudofaa kuchlari boshqa nishonlar qatori Eron dengiz sanoati tashkiloti shtab-kvartirasiga ham zarba bergani haqqida xabar qildi. E’lon qilingan press-relizda aytilishicha, bu konsern (inglizchasiga Marine Industries Organisation) dengiz qurollarining keng assortimentini, shu jumladan suvusti va suvosti kemalarini hamda dengiz dronlarini ishlab chiqaradi.

Bu konsern Yevroittifoq, AQSh, Britaniya va boshqa mamlakatlar tomonidan sanksiyaga uchragan. U Eronning turli qismlarida o‘z zavodlariga ega.

Jahon agentliklari xabariga ko‘ra, Isroil armiyasi press-attashesi Isroil Eron harbiy sanoatiga zarbalar berish chastotasini oshirayotgani va "«bir necha kun ichida uning barcha muhim tarkibiy qismlariga zarbalarni yakunlash»ni rejalashtirayotganini aytdi.

Eronning bayonotlari

Erondagi davlat nashrlari shanba kuni AQShning mintaqadagi harbiy nishonlariga muvaffaqiyatli zarbalar berilgani haqida e’lon qilishda davom etdi, amerikaliklar esa bu xabarlar yolg‘on ekanini ta’kidlashda davom etmoqda.

Eron bosh shtabining «Defa-press» nashri bosh shtab press-attashesi, polkovnik Ibrohim Zulfiqoriyga tayanib, Eron Dubaydagi ikki nuqtaga zarba berish orqali amerikaliklarga «juda og‘ir yo‘qotishlar» yetkazib, 500 ga yaqin kishini o‘ldirgani haqida xabar bergan.

Amerika Markaziy qo‘mondonligi bunga X ijtimoiy tarmog‘i orqali javob qaytargan: «Dubayda AQSh shaxsiy tarkibiga zarbalar bo‘lgani yo‘q. Eron rejimi ularning harbiy salohiyati yo‘q qilingani va bostirilgani haqidagi rad etib bo‘lmaydigan haqiqatni yashirish uchun ijtimoiy tarmoqlarda yolg‘on to‘qimoqda».

Islom inqilobi muhofizlari korpusi shanba kuni Fars News agentligi orqali o‘z havo hujumidan mudofaa kuchlari mamlakat janubidagi Fors viloyati hududida Amerikaning F-16 rusumli qiruvchi samolyotiga zarba bergani, u Saudiya Arabisoniga qo‘nmoqchi bo‘lganida qulab tushgani, shuningdek, Sheroz ustida amerikaliklarning MQ-9 rusumli dronini urib tushirgani haqida xabar tarqatdi.

AQSh Markaziy qo‘mondonligi bu xabar yuzasidan hozircha munosabat bildirmadi.

Livanda «Hizbulloh»ga aloqador jurnalistlar o‘ldirildi

Shanba kuni Livan janubida Isroilning avtomobilga bergan zarbasi oqibatida «Hizbulloh» guruhiga aloqador telekanallarning uch nafar xodimi halok bo‘ldi.

«Al-Manar» telekanali o‘z muxbiri Ali Shaib Isroil zarbasi qurboni bo‘lgani haqida xabar bergan. «Al-Mayadin» telekanali ham o‘z muxbiri Fotima Ftuniy ham shu hodisa oqibatida halok bo‘lgani haqida xabar tarqatdi. Bundan tashqari, Livan axborot vaziri ma’lum qilishicha, mashinada Fotima Ftunining ukasi va operatori hisoblangan Muhammad Ftuni ham bo‘lgan.

«Al-Manar» «Hizbulloh» guruhi tomonidan nazorat qilinadi, «Al-Mayadin» Eron va uning mintaqadagi ittifoqchilarini qo‘llab-quvvatlovchi kanal hisoblanadi.

Isroil armiyasi Ali Shaibni «Hizbulloh» razvedkasi xodimi va Livan janubidagi Isroil harbiylarining pozitsiyalarini aniqlash bilan shug‘ullangan terrorchi deb hisoblagani uchun «yo‘q qilgani» haqida xabar berdi. Bundan tashqari, isroilliklar uni o‘zlariga nisbatan nafrat qo‘zg‘atishda ayblagan. Isroil armiyasi o‘z bayonotida Shaibning «Hizbulloh» razvedkasiga aloqadorligiga isbot keltirmagan.

«Al-Manar» telekanali Shaibning o‘limi haqidagi bayonotida uni «qarshilik jurnalistikasi afsonasi» deb atagan.

Ali Shaib 2010 yilda ham Livan janubida ishlayotganida og‘ir yaralangandi.

Livan prezidenti Jozef Aun X tarmog‘i orqali halok bo‘lganlar «o‘z kasbiy burchini bajarayotgan fuqarolar» bo‘lganini ma’lum qildi.

«Bu surbetlarcha jinoyat butun dunyo bo‘ylab urushda jurnalistlarni himoya qiladigan barcha shartnomalar va normalarni buzadi», – dedi Livan prezidenti.

Chorshanba kuni Livanda Isroil aviazarbasi oqibatida «Al-Manar»ning shtatdan tashqari xodimi Husayn Hamud halok bo‘lgandi.

AQShda joylashgan Jurnalistlarni himoya qilish qo‘mitasi (CPJ) ma’lumotlariga ko‘ra, Isroil va AQShning Eron bilan urushi boshlanganidan beri mintaqada havo hujumlari oqibatida yana kamida uch nafar jurnalist halok bo‘lgan.

Bundan tashqari, Isroil muxoliflari uni Livanda qutqaruvchilar, shifokorlar va paramediklarga ham zarba berishda ayblamoqda.

BBC’ning mintaqadagi muxbiri Hyugo Bacheganing xabar berishicha, shanba kuni Livan janubidagi Zavtar shahrida isroilliklar zarbasi oqibatida besh nafar tibbiyot xodimi halok bo‘lgan.

Livan sog‘liqni saqlash vaziri Rakan Nasriddin Isroil va «Hizbulloh» o‘rtasida urushning yangi bosqichi boshlangan 2 mart kunidan buyon Livanda 51 nafar qutqaruvchi va paramediklar halok bo‘lganini ma’lum qildi – shundan to‘qqiz o‘lim holati shanba kuniga to‘g‘ri keladi.

Vazirning aniqlik kiritishicha, bu to‘qqiz kishidan to‘rt nafari «Hizbulloh» qoshidagi islom sog‘liqni saqlash qo‘mitasi xodimlari bo‘lgan, qolgan besh kishi esa «Hizbulloh»ga ittifoqichsi bo‘lgan «Amal» yoshlar harakati a’zolari edi.

Livan bo‘yicha ekspertlar qayd etishicha, doktor Rakan Nasriddining o‘zi ham «Hizbulloh» a’zosi hisoblanadi: u o‘tgan yil boshida shialarning «Hizbulloh» va «Amal» partiyalari Livan hukumatini tuzish chog‘ida uning tarkibiga kiritilgan besh vazirdan biri edi.