Namangan hokimi Afg‘onistonga bordi

Namangan viloyati hokimi Shavkat Abdurazzoqov boshchiligidagi delegatsiya Afg‘onistonga tashrif buyurdi. Delegatsiya tarkibidan hokim o‘rinbosarlari, shuningdek, 30 dan ortiq yirik o‘zbek tadbirkorlari va investorlari o‘rin olgan.

Tashrif doirasida Afg‘oniston vakillari bilan uchrashuvlar, konferensiyalar hamda savdo muzokaralari o‘tkazildi. Ularda ikki tomonlama hamkorlikni yanada rivojlantirish, savdo aloqalarini kengaytirish va yangi investitsiyaviy loyihalarni amalga oshirish masalalari muhokama qilindi.

Delegatsiyaning Balx viloyatiga ham tashrif buyurishi kutilmoqda. U yerda mahalliy hokimiyat va xususiy sektor vakillari bilan ishbilarmonlik uchrashuvlari tashkil etiladi. Shuningdek, Mozori Sharif shahrida o‘zbek mahsulotlari ko‘rgazmasini ochish rejalashtirilgan bo‘lib, unda milliy mahsulotlarning sifati va xilma-xilligi namoyish etiladi.

Joriy yilning fevral oyida Sirdaryo viloyati hokimi Erkinjon Turdimov boshchiligidagi delegatsiya ham Afg‘onistonga tashrif buyurib, qator muhim uchrashuvlar o‘tkazgan edi.

Yaqin kunlarda O‘zbekistonning boshqa hududlari rahbarlarining ham savdo-iqtisodiy hamkorlikni yanada kengaytirish maqsadida Afg‘onistonga tashriflari kutilmoqda.

Ikki davlat vakillari o‘rtasida olib borilayotgan muzokaralar o‘zaro manfaatli loyihalarni amalga oshirish, hududlararo aloqalarni mustahkamlash va yangi iqtisodiy imkoniyatlarni ro‘yobga chiqarishga xizmat qiladi.