“Orion” kemasi Yerdan 407 ming kilometr uzoqlashdi

“Artemida-2” missiyasi astronavtlari dushanba, 6 aprel kuni, “Orion” kosmik kemasida Yerdan insoniyatning kosmik parvozlar tarixi davomidagi eng uzoq masofasigacha borib, rekord o‘rnatdi: 407 000 kilometr.

AQShning Milliy aeronavtika va fazoni tadqiq etish boshqarmasi (NASA) X ijtimoiy tarmog‘ida ma’lum qilishicha, bu 1970 yildagi “Apollon-13” missiyasi davomida o‘rnatilgan avvalgi rekorddan 4102 milyaga (taxminan 6500 km) ko‘proqdir.

Shu kunning o‘zida, ya’ni 6 aprel kuni avvalroq, “Orion” Oyning tortish kuchi Yernikidan kuchliroq ta’sir qiladigan hududga kirdi. NASA ma’lumotiga ko‘ra, o‘sha paytda kema sayyoraning tabiiy yo‘ldoshi sirtidan taxminan 63 000 km, Yerdan esa taxminan 232 000 km masofada bo‘lgan.

“Orion” kemasi 1 aprel kuni AQShning sharqiy sohilidan uchirilgan edi. Uning bortida NASA astronavtlari Rid Uaysmen, Viktor Glover va Kristina Kuk, shuningdek, Kanada kosmik agentligi astronavti Jyeremi Xansen bor.

Ekipaj 10 sutka davomida Yerning tabiiy yo‘ldoshi — Oyni aylanib chiqib, so‘ng Yerga qaytishi kerak.

Bundan tashqari, missiya ishtirokchilari yangi skafandrlarni ham sinab ko‘rdi. Ular avtonom rejimda olti kungacha nafas olish imkonini ta’minlay oladi.