Peter Mojar kim va undan nima kutish kerak?

Xuddi shu vaqtda Mojar «Fides» bilan aloqani uzgani va kichikkina «Tisa» partiyasi boshqaruviga o‘tganini e’lon qiladi, tez orada bu partiya uning rahbarligida katta mashhurlikka erishadi. «Fides» Vengriyadagi eng yirik nashrlarni nazorat qilgani tufayli Mojar asosiy e’tiborni ijtimoiy tarmoqlarga va mamlakat bo‘ylab safarlarga qaratadi. U chekka qishloqlar aholisi hamda xorijdagi etnik vengrlar bilan muntazam uchrashuvlar o‘tkazadi – ushbu ikki guruh ham azaldan «Fides» elektorati hisoblangan.

Bundan tashqari, Mojarga uni tizimdan chiqqan, uning zaif tomonlarini biladigan, shuning uchun Orbanni mag‘lub eta oladigan nomzod sifatida qabul qilishgani ham qo‘l keldi. «Biz „Tisa“ uchun emas, balki „Fides“ga qarshi ovoz beramiz. Hamma gap shunda. Vengrlar hozirgi kunda Orbanga qarshi nomzodini qo‘yadigan bo‘lsa, echkiga ovoz berishga ham tayyor», – degandi Politico nashriga Yashillar partiyasidan parlamentga saylangan deputat Timea Sabo. Uning o‘zi ham avvaliga saylovda qatnashmoqchi bo‘lgan, ammo «Tisa» nomzodi foydasiga poygadan chiqqandi.

U Budapeshtning Kiyev va Moskva bilan munosabatlarini qanday o‘zgartiradi?

Mojar – o‘ng markazchi qarashlarga ega siyosatchi. U Yevroittifoq va AQSh bilan yaqinlashish tarafdori bo‘lib, Orban va Bryussel o‘rtasidagi kelishmovchiliklar tufayli bloklangan milliardlab yevro mablag‘lar blokdan yechilishiga erishishni va’da qilgan. Shuningdek, Mojar mudofaa uchun xarajatlarni YaIMning 5 foizi miqdoriga yetkazmoqchi – bu NATO mamlakatlari yetishi kerak bo‘lgan ko‘rsatkich hisoblanadi.

Shu bilan birga, u migratsiyani qat’iy tartibga solishni yoqlaydi, Kiyevga Rossiya bilan urushi uchun qurol yuborishni ma’qullamaydi va Ukrainaning Yevroittifoqqa kirishini tezlashtirishni qo‘llab-quvvatlamaydi. Mojar Yevroittifoq a’zoligi uchun nomzodlarning barchasi bir xilda baholanishi kerakligi va Ukraina hozircha a’zo bo‘lish shartlariga javob bermasligini aytadi. «Agar yillar o‘tib vaziyat o‘zgaradigan bo‘lsa, Vengriya Ukrainaning Yevroittifoqqa a’zolik arizasini ma’qullash masalasini referendumga qo‘yadi», – deya va’da bergan Mojar.

Shunday ritorikasiga qaramay, Yevroittifoqdagilar yaqin istiqbolda Ukraina va Vengriya munosabatlaridagi keskinlik yo‘qolishidan umid qilmoqda. Xususan, Berlin allaqachon Budapeshtni Kiyev uchun 90 milliard yevrolik kreditga Orban tomonidan qo‘yilgan vetoni bekor qilishga chaqirgan. Shu bilan birga, fevralda «Tisa» vakillari Yevroparlamentda ushbu kredit ajratilishiga qarshi ovoz berishgandi.

Mojar Rossiya bilan munosabatlar «pragmatik» bo‘lishi kerakligini aytgan. Shu bilan birga, u aniq qilib Vengriyani Kremlga energetik qaramlikdan xalos qilish hamda mamlakatning g‘arb tomon kursini mustahkamlash niyatida ekanini aytgan. «Keling, Sharq va G‘arb o‘rtasidagi paromlar to‘g‘risidagi debatlarni bas qilib, butun umrga G‘arbga qo‘shilaylik!» – deyiladi «Tisa» partiyasining siyosiy dasturida.

Mojar – Orban kabi populistmi?

Siyosiy metodlariga ko‘ra Mojarni populist deb hisoblash mumkin, ammo u Orbanning «avtoritar populizmi»ga qarshi «demokratik populizm»ga namunadir, deb hisoblaydi vengriyalik politolog Zoltan Adam. U Mojar va «Tisa»ning parlament saylovlaridagi g‘alabasi Vengriyaga demokratiyani tiklash umidini beradi, shu bilan birga, avtokratiya chuqurlashishi xavfini ham tug‘diradi. Parlamentda konstitutsiyaviy ko‘pchilikka erishgan «Tisa»ni endi tiyib turuvchi demokratik institutlar yo‘q, chunki ular «Fides» tomonidan yo‘q qilingan. Bu esa shuni anglatadiki, Mojar ham xuddi Orbanda bo‘lgani kabi to‘liq hokimiyatga egalik qiladi va bundan qanday foydalanish uning o‘ziga havola bo‘ladi.

Shu bilan birga, Mojar baribir o‘tmishdoshi tayyorlagan cheklovlarga duch keladi. «Fides» tomonidan muhim lavozimlarga qilingan tayinlovlar, OAV nazorati va hatto Orbanga yaqin hisoblangan prezident Tamash Shuyok ham ta’sir ko‘rsatish dastagi bo‘lib qolmoqda.

Vengriya muxolifati Mojarni Orbanga qarshi kuch sifatida keng qo‘llab-quvvatlagan bo‘lsa-da, uning «Fides»dagi o‘tmishi, shuningdek, uning yetakchilik uslubi (u «bir kishilik shou» deb ta’riflanadigan «Tisa» partiyasini yakka o‘zi boshqaradi) ba’zilarni xavotirga solmoqda. Muxolifatchilarning 2022 yilgi saylovlarda Orbanga yutqazgan nomzodi Peter Marki-Zai Politico nashriga Mojarni «manman», «xudbin» va «pastkash» deb hisoblashini aytadi. Ammo Orbanga qarshi turish uchun aynan shunday xususiyatlar kerakligini qo‘shimcha qilgan. «Biz unga turmushga chiqmoqchi emasmiz. Bizga shunchaki Orbanni o‘tmishda qoldiradigan odam kerak. <...> Agar u o‘z va’dalarini bajarmasa, biz unga toqat qilmaymiz», – deydi Marki-Zai.