Oq uy prezident Trampni «qirol» deb atadi

Oq uyning ijtimoiy tarmoqdagi rasmiy akkauntida AQShga tashrif buyurgan Buyuk Britaniya qiroli Charlz III va prezident Donald Tramp o‘rtasidagi uchrashuv surati «Ikki qirol» so‘zlari bilan e’lon qilindi.

Charlz III va qirolicha Kamillaning rasmiy salomlashuvi paytida olingan va «Ikki qirol» deb nomlangan suratda prezident Tramp va Charlz III Oq uy oldidagi maysazorda kulib turibdi.

Reuters nashriga ko‘ra, bu Trampning ikkinchi prezidentlik muddati davomida monarxiya ramzlari bilan o‘ynashgan birinchi holat emas.

2025 yil oktabr oyida u sun’iy intellekt tomonidan yaratilgan videoni e’lon qildi. Tramp unda o‘z ma’muriyatiga qarshi «Yo‘qolsin qirollar» shiori ostida o‘tkazilgan namoyish ishtirokchilari ustidan uchib o‘tayotgan qiruvchi samolyotning shturvalida toj kiygan holda tasvirlangan. Kongressdagi respublikachilar yetakchilari bu namoyishlarni muntazam ravishda «Amerikaga nafrat» mitinglari deb ataydi. Parvozning o‘rtasida Tramp yig‘ilganlar ustiga axlat to‘kadi.

Sun’iy intellekt yordamida yaratilgan yana bir videoda u toj, qirollik libosi va qilich bilan tasvirlangan, demokrat kongressmenlar esa uning qarshisida tiz cho‘kadi.

Yaqinda Tramp o‘zini Iso Masih qiyofasida aks ettirgan suratni e’lon qildi, biroq hatto tarafdorlari ham uni tanqid qilganidan so‘ng, suratni o‘chirib tashladi.

Shu bilan birga, Tramp boshqaruvining so‘nggi yilida Qo‘shma Shtatlarda «Yo‘qolsin qirollar» shiori ostida muntazam ravishda keng ko‘lamli namoyishlar bo‘lib o‘tmoqda, bu mamlakat tarixidagi eng ommaviy norozilik namoyishlaridan biriga aylandi. So‘nggi ommaviy aksiyalar mart oyining oxiri va aprel oyi boshida bo‘lib o‘tdi va mamlakatning deyarli barcha 50 shtatini qamrab oldi. Namoyishchilar «Yo‘qolsin qirollar» shioridan tashqari, «Avtoritarizmdan demokratiyaga qaytish», «Yo‘qolsin Tramp», «Yo‘qolsin Migratsiya xizmati», «Eron bilan urush to‘xtatilsin» shiorlari yozilgan plakatlarni ko‘tardi.