Xotinini o‘ldirish uchun 10 ming dollarga killer yollagan erkak ushlandi

Poytaxt IIBB xabariga ko‘ra, u qotillikni amalga oshirish uchun tanishiga oldindan 2 ming dollar bergan. Buyurtmachi yollanma qotilga ayolning yashash manzili, xonadon raqami, avtomobili, kimlar bilan yashashi, qachon uyga kirib-chiqishi haqida batafsil ma’lumotlarni taqdim etgan.

Shundan so‘ng, Jinoyat-qidiruv bo‘limi xodimlari ayolning o‘limini sahnalashtirish bo‘yicha maxsus tezkor tadbir o‘tkazgan. Ayolni o‘ldirish uchun yollangan shaxs esa tezkor ma’lumotlar asosida avvalroq ichki ishlar organlari nazoratiga olingan va keyinchalik huquq-tartibot idoralari bilan hamkorlik qilgan.

20 aprel kuni o‘tkazilgan tezkor tadbirda yollanma qotil buyurtmachi bilan uchrashib, unga xotini o‘ldirilgani haqida xabar bergan. Bu xabarni eshitgan erkak 6,5 million so‘m hamda jabrlanuvchi nomidagi Tracker avtomobilini topshirgan vaqtida ashyoviy dalillar bilan qo‘lga olingan.

Holat yuzasidan Jinoyat kodeksining 97-moddasi bilan jinoyat ishi qo‘zg‘atilgan. Unga nisbatan qamoq ehtiyot chorasi qo‘llangan, tergov harakatlari davom etmoqda.