O‘zbekiston Respublikasi Davlat xavfsizlik xizmati, Ichki ishlar vazirligi hamda Din ishlari bo‘yicha qo‘mita tomonidan taqiqlangan diniy materiallardan ogohlantirish va xabardor qilish tizimi – din.uzbbot maxsus chat-boti ishga tushirildi. Bu haqda Diniy qo‘mita matbuot xizmati ma’lum qildi.
Ushbu platforma orqali fuqarolar diniy materiallarning dinshunoslik ekspertizasi xulosasi mavjud yoki mavjud emasligini, shuningdek, ayrim shaxs va tashkilotlar faoliyati qonunchilikka muvofiq yoki taqiqlanganini tekshirish imkoniyatiga ega bo‘ladi.
Kun.uz muxbiri botning har bo‘limidagi xizmatlar qanday ishlashini tekshirib ko‘rdi.
Avvalo botning nomi haqida. Rasmiylarning e’lonida bot – din.uzbbot deya tanishtirilmoqda, ammo uning tavsifidagi nomi “Xavfsiz bot”. Bizningcha bu foydalanuvchilarni chalg‘itadi.
Telegram messenjeridagi ushbu botda quyidagi xizmatlar bor:
- Taqiqlangan profillarni tekshirish;
- Diniy adabiyotlarni tekshirish;
- Taqiqlangan shaxs va tashkilotlar ro‘yxati;
- Umra litsenziyasiga ega turfirmalar ro‘yxati;
- Rasmiy diniy manbalar;
- Huquqiy hujjatlar bilan tanishish;
- Izoh va takliflar.
Birinchi – «Taqiqlangan profillarni tekshirish» bo‘limi orqali biror profil yoki shaxs nomini kiritish mumkin. Bot Oliy sudning qarori bilan taqiqlangan profil haqida quyidagi ma’lumotlarni taqdim etadi: profil nomi, qaysi ijtimoiy tarmoqda ekani, u haqida xulosa va tavsiya. Shuningdek, kiritilgan shaxs nega taqiqlanganini asoslovchi ma’lumotlar ham beriladi.
