Ukrainada Andrey Yermak pul yuvishda gumonlanmoqda

Ukraina Milliy antikorrupsiya byurosi (NABU) va Ixtisoslashtirilgan antikorrupsiya prokuraturasi (SAP) mamlakat prezidenti ofisi sobiq rahbari Andrey Yermakka nisbatan jinoiy yo‘l bilan olingan mablag‘larni legallashtirish bo‘yicha gumon e’lon qildi.

Tergov ma’lumotlariga ko‘ra, gap Kiyev yaqinidagi nufuzli qurilish loyihasi orqali 460 million grivna — taxminan 8,9 million yevro mablag‘ni yuvish haqida ketmoqda.

NABU va SAP xabarlariga ko‘ra, Yermak uyushgan jinoiy guruh tarkibida harakat qilgan bo‘lishi mumkin. Ushbu guruh Ukraina antikorrupsiya organlari tomonidan “Midas” operatsiyasi doirasida fosh etilgan.

“Ukrainskaya pravda” nashrining yozishicha, Andrey Yermak korrupsiya bilan bog‘liq ayblovlarni rad etgan. U o‘zining “faqat bitta avtomashinasi va bitta kvartirasi” borligini ta’kidlagan.

Ukraina prezidenti Volodimir Zelenskiy 2025 yil 28 noyabr kuni Yermakni prezident ofisi rahbari lavozimidan ozod qilgan edi.

Bundan oldin Yermak “Energoatom” kompaniyasi atrofidagi korrupsiya mojarosi va uning uyida o‘tkazilgan tintuvlar ortidan iste’fo haqida ariza yozgan.

Andrey Yermak 2020 yil fevraldan boshlab Ukraina prezidenti ofisini boshqarib kelgan. U Volodimir Zelenskiyning eng yaqin hamkorlaridan biri va mamlakatda prezidentdan keyingi eng ta’sirli shaxslardan biri sifatida ko‘rilgan.

Ukraina prezidenti maslahatchisi Dmitriy Litvin mazkur gumon haqidagi xabarlarda hayratlanarli hech narsa yo‘qligini aytgan.

“Bu mavzudagi muhokamalar ommaviy axborot vositalarida anchadan beri davom etib kelayotgan edi”, — degan u “Ukrainskaya pravda”ga.