Si Putin bilan Rossiya gazi uchun shartnoma tuzishni yana rad etdi

Vladimir Putinning urush boshlanganidan beri beshinchi va prezidentlik davrida 25-chi marta Xitoyga tashrifi Rossiyaga «Sila Sibiri – 2» gaz quvurini qurish bo‘yicha uzoq kutilgan kelishuvni olib kelmadi.

10 yildan ortiq vaqtdan beri muhokama qilinayotgan va Xitoyga gaz yetkazib berishni yiliga 100 milliard kub metrgacha oshirishni nazarda tutuvchi loyiha bo‘yicha kelishilmagan «jihatlar» qoldi, dedi prezident matbuot kotibi Dmitriy Peskov Putinning Xitoy raisi Si Jinping bilan muzokaralaridan so‘ng.

«Ba’zi nozik jihatlarni hal qilish kerak», dedi Peskov va «asosiy parametrlar» va bo‘lajak quvur yo‘nalishi kelishib olinganini, biroq loyihani amalga oshirish muddatlari bo‘yicha hali ham aniq kelishuv yo‘qligini qo‘shimcha qildi.

«Hozircha aniq emas. Har holda bu tijorat axboroti. Ammo bu juda katta yutuq», deb Peskovning so‘zlarini keltirdi «Interfaks».

Putin o‘zi bilan Pekinga ko‘p sonli delegatsiyani, jumladan, 5 nafar bosh vazir o‘rinbosari, 8 nafar vazir va yirik davlat kompaniyalari, jumladan, «Gazprom» va «Rosneft» rahbarlarini olib bordi. Tashrif chog‘ida u Rossiya-Xitoy hamkorligining «cheksiz istiqbollari» haqida gapirdi va Xitoyga neft, ko‘mir va gazni «uzluksiz» eksport qilishga va’da berdi.

Muzokaralar yakunida Moskva va Pekin 40 ta hujjat imzoladi. Ammo Kreml tomonidan e’lon qilingan ro‘yxatga ko‘ra, ularning hech biri «Sila Sibiri – 2» quvuri va neft-gaz sohasidagi hamkorlikni nazarda tutmaydi.

Hozir Xitoy Rossiyadan har yili 38 milliard kub metr gaz sotib olmoqda - bu «Gazprom» kompaniyasining uzoq xorijga eksportining yarmi bo‘lib, 1980-yillarning oxiridan beri eng past darajaga yaqin ko‘rsatkich. O‘n yillikning oxirigacha Rossiya hukumati Xitoyga yetkazib berishni 47 foizga oshirib, yiliga 56 milliard kub metrga yetkazishni rejalashtirmoqda. Qo‘shimcha gaz Uzoq Sharq yo‘nalishi bo‘yicha (12 milliard kub metr) va «Sila Sibiri – 1» quvuri quvvatini kengaytirish hisobiga (6 milliard kub metr) yetkazib beriladi.