OAV vakillari bilan matbuot anjumanida Kun.uz qo‘mitadan qurilishi to‘xtab qolgan Buxoro turizm markazi haqida so‘radi. Rais Abdulaziz Aqqulovga ko‘ra, hududda ikkita mehmonxona barpo qilinishi rejalangan. Biroq bu obektlar YuNESKO ro‘yxati hamda bufer zonaga kirmaydi. Loyihaning egalaridan so‘rab bilish kerak, deydi u.
Madaniy meros agentligi yaqinda bo‘lib o‘tgan ochiq muloqotda Buxoro turizm markazi haqidagi savolni javobsiz qoldirgan edi.
Turizm qo‘mitasining OAV vakillari bilan matbuot anjumanida Kun.uz bu masalani yana bir bor ko‘tardi. Qo‘mita raisining javob berishicha, loyihaning kelajagi noaniq emas va uni loyihaga mas’ullarning o‘zidan so‘rash kerak bo‘ladi. Mening bilganim - ikkita mehmonxona qurilishi belgilangan edi, deydi Abdulaziz Aqqulov.
- Bugun o‘sha hudud buzilgan, yarim-chala buzilgan, atrofi bannerlar bilan o‘ralgan va shu holatda turibdi. Buxoro quruq, har kuni chang ko‘tariladi. Nima bo‘larkan, degan savol aktual. Xo‘sh, mana shu Buxoro turistik markazi nima bo‘ladi o‘zi?
”Menimcha, bunga ham sizga biz qo‘shimcha javob beramiz. Ushbu loyiha doirasida qurilishi kerak bo‘lgan mehmonxona kompleksi bor. U bufer zonasiga ham, himoya zonasiga ham kirmaydi. Bizning xabardor bo‘lgan qismimiz, ikkita mehmonxona ishga tushishi kerak, u himoya zonasida ham, bufer zonada ham emas. Men mas’ul bo‘lgan yo‘nalish ma’nosida aytyapman. Lekin ichki kompleksda bo‘lishi kerak bo‘lgan yoki qandaydir jarayonlar haqida menda ma’lumot yo‘q”, - deydi Turizm qo‘mitasi raisi.
U so‘zini davom ettirarkan, loyihaning kelajagi noaniq emas, faqat uning o‘z egalari bor, deya qo‘shimcha qildi.
Eslatib o‘tamiz, Buxoroda buzish ishlari davom etayotgan bir onda Markaziy Osiyodagi madaniy meros obektlarini himoya qiluvchi tashkilotlar jarayondan xavotirini bildirib, qurilishni to‘xtatishni taklif qildi.
Hozir “Boqiy Buxoro” etnografik sayyohlik markazi uchun tanlangan hudud buzilganidan keyin bo‘shligicha qolmoqda, atroflari o‘rab olingan. Mahalliy aholiga ko‘ra, ichkarida unga tutash boshqa binolarni ham buzish-buzmaslik masalalari muhokamada bo‘lishi mumkin.
24 aprel kuni Madaniy meros agentligi ochiq muloqot o‘tkazarkan, Kun.uz aynan Buxoro bo‘yicha rasmiylardan aniq izoh so‘ragandi. Loyiha to‘xtab qoldi, buzilishidan avval reja puxta qilinmagan edimi?
