Eron aholisiga xalqaro internet qayta ochiladi

Eronning Fars agentligi xabar berishicha, mazkur qaror internetdan foydalanishni qayta tiklashni qo‘llab-quvvatlagan maxsus ishchi guruh yig‘ilishidan keyin qabul qilingan. Ayni paytda cheklovlar qachon to‘liq bekor qilinishi bo‘yicha aniq sana aytilmagan.

Avvalroq, may oyi o‘rtasida Eron OAV internet cheklovlari 5 iyundan boshlab bekor qilinishi mumkinligini ma’lum qilgan edi.

Eslatib o‘tamiz, Eron hukumati 28 fevral kuni AQSh va Isroil bilan urush boshlanganidan so‘ng global internetga kirishni cheklagandi. Shundan keyin mamlakatning qariyb 90 million aholisi faqat davlat tomonidan tasdiqlangan saytlarga kirish imkonini beruvchi “milliy internet”dan foydalanib kelayotgan edi.

Ma’lumotlarga ko‘ra, internet cheklovlari ayniqsa onlayn savdo bilan shug‘ullanuvchi aholiga jiddiy iqtisodiy zarar yetkazgan. Taxminan 1 millionga yaqin fuqaroning daromadi keskin kamaygan.

Eron rasmiylari internet cheklovlarini milliy xavfsizlik bilan izohlagan bo‘lsa, kuzatuvchilar bu choralar urush oqibatlarining haqiqiy ko‘lamini yashirish maqsadida joriy etilgan bo‘lishi mumkinligini ta’kidlamoqda.