Rossiyada Putinning umrini uzaytirish bo‘yicha dastur ishga tushirildi - WSJ

Rossiya hukumati keksayib borayotgan Vladimir Putinning umrini uzaytirish texnologiyalarini izlashga qaratilgan 26 milliard dollarlik keng ko‘lamli dasturni ishga tushirdi, deb yozdi The Wall Street Journal.

Ta’kidlanishicha, prezidentning qizi Mariya Voronsova va Putinning do‘sti, Kurchatov instituti rahbari Mixail Kovalchuk boshchiligidagi loyiha doirasida olimlar to‘qimalarni bioprinterlash, gen terapiyasi yordamida hujayra qarishini sekinlashtirish ustida ishlamoqda, shuningdek, genetik jihatdan o‘zgartirilgan mini-cho‘chqalar ichida odamga ko‘chirib o‘tkazish uchun organlarni o‘stirishga harakat qilmoqda.

Birinchi shunday cho‘chqa 2030 yilga borib paydo bo‘lishi kerak. Kreml Putinning beshinchi muddati boshlanganidan keyin boshlagan va budjetdan moliyalashtiriladigan «Sog‘liqni saqlashning yangi texnologiyalari» milliy loyihasi ham shu muddatga mo‘ljallangan.

WSJ ta’kidlashicha, 73 yoshli Putin va uning atrofidagilar hayotni uzaytirish va biotexnologiyalarga katta qiziqish bildiryapti. Xususan, Putin Xitoy raisi Si Jinping bilan suhbatda umrboqiylik va organlarni almashtirish mavzusini ko‘tarib, bu orqali hayotni 150 yilgacha uzaytirish mumkinligini ta’kidlagan.

Avvalroq Putin krioterapevtik amaliyotlarga ham qiziqqan va hatto Avstriyaning o‘sha paytdagi kansleri Sebastyan Kursga tanani yoshartirish uchun o‘ta past haroratli kriokamerani sinab ko‘rishni tavsiya qilgan edi, deb yozdi WSJ.

Rossiyalik olimlar ikkita asosiy yo‘nalishga e’tibor qaratmoqda: bioprint (tirik to‘qimalar va organlarning 3D-bosmasi) va ksenotransplantatsiya - hayvonlar tanasida odamga mos keladigan genetik jihatdan o‘zgartirilgan organlarni o‘stirish. Ayrim tajribalarda sichqonning tog‘ay to‘qimasi va qalqonsimon bezining bioprinti haqida da’vo qilingan. Kreml matbuot xizmati WSJ nashriga Rossiyada bu sohada bir qator ilmiy dasturlar bo‘yicha ishlar olib borilayotgani va loyihalar davlat tomonidan qo‘llab-quvvatlanayotganini tasdiqladi.

Loyihani boshqarayotgan Putinning eng yaqin do‘stlaridan biri Kovalchuk avvalroq ilm-fan kelajakda inson tanasi qismlarini «ta’mirlash» va almashtirish hamda inson umrini uzaytirish imkonini berishi mumkinligini aytgan edi.