Rossiya Ukraina bo‘ylab 73 ta raketa va yuzlab dron uchirdi: kamida 11 kishi halok bo‘ldi

Seshanba kungi fotosuratlarda kuchli portlashlar va Kiyevdagi ko‘p qavatli binolar uzra ko‘tarilayotgan quyuq tutun ustunlari aks etgan. Kiyev meri Vitaliy Klichkoning so‘zlariga ko‘ra, bu yerda tungi zarbalar oqibatida to‘rt kishi halok bo‘lgan va 65 kishi, jumladan bolalar jarohatlangan.

Klichkoning qo‘shimcha qilishicha, 24 qavatli turar joy binosiga raketa kelib tushishi oqibatida binoning bir qismi qulab tushgan va odamlar vayronalar ostida qolib ketgan bo‘lishi mumkin. Shuningdek, raketa parchalari tushishi oqibatida yong‘in chiqqan binolar orasida 9 qavatli turar joy binosi ham bor.

Reutersʼning guvohlar so‘zlariga tayanib yozishicha, seshanba kuni erta tongda havo hujumidan mudofaa tizimlarining Rossiya hujumlarini qaytarayotgan ovozi ostida minglab odamlar boshpana izlab Kiyev metrosiga oqib kelgan.

Ularning ba’zilari uy hayvonlari, shaxsiy buyumlari va matraslarini o‘zlari bilan birga olib kelishgan. Tong otgandan kech ham poytaxtda yana portlash tovushlari eshitilib turgan.

Dnipro gubernatori Oleksandr Ganja Dnipro shahri va uning atrofida uyushtirilgan raketa va dron hujumi oqibatida yetti kishi halok bo‘lgani va 36 kishi jarohatlanganini ma’lum qildi.

U o‘zining Telegram kanalida vayron bo‘lgan turar joy binolari, yonib ketgan avtomobillar va shikastlangan bolalar maydonchasi suratlarini joylashtirgan. Gubernator barcha yaradorlar shifoxonaga yotqizilgani va ularning ahvoli o‘rtacha og‘irlikda ekanini qo‘shimcha qildi.

Favqulodda vaziyatlar xizmati ma’lumotlariga ko‘ra, halok bo‘lganlardan biri qutqaruvchilarni nishonga olgan «ikki marta takroriy zarba» oqibatida hayotdan ko‘z yumgan qutqaruv xodimidir.

Ukrainaning shimoli-sharqidagi Xarkov viloyatida ham dron va raketa hujumlari oqibatida 10 kishi jarohatlangan, ular orasida bola ham bor.

Yirik hujumdan ogohlantirish

O‘tgan haftada Kreml Luhanskdagi kollej yotoqxonasiga uyushtirilgan va 21 kishining o‘limiga sabab bo‘lgan dron hujumiga javoban Kiyevdagi nishonlarga «tizimli zarbalar» berishidan ogohlantirgan edi. Ukraina esa o‘sha hujumda yotoqxona emas, harbiy baza nishonga olinganini aytgan.

Ukraina Harbiy-havo kuchlarining ma’lum qilishicha, Rossiya tunda asosan Kiyevni nishonga olgan holda 656 ta dron va 73 ta raketa uchirgan. Ulardan 40 ta raketa va 602 ta dron urib tushirilgan yoki zararsizlantirilgan.

Harbiy-havo kuchlari matbuot kotibiga ko‘ra, Rossiya hujumida sakkizta «Tsirkon» gipertovushli raketasidan foydalanilgan. Bu Rossiya tomonidan urush davomida ushbu turdagi raketalarning bir vaqtning o‘zida eng ko‘p qo‘llanilishi bo‘lishi mumkin. Ma’lumotlarga ko‘ra, «Tsirkon» raketasining parvoz masofasi 1000 km bo‘lib, u tovush tezligidan to‘qqiz baravar yuqori tezlikda harakatlanadi.

Rossiya Mudofaa vazirligi ham yuqori aniqlikdagi uzoq masofali qurollardan foydalangan holda Ukrainaning mudofaa sanoati obektlariga «yalpi zarba» berilganini tasdiqladi.

Rossiya hududidagi vaziyat

Rossiya hududlari ham hujumga uchradi. Rossiya janubidagi Krasnodar o‘lkasida joylashgan Ilskiy neftni qayta ishlash zavodida dron hujumidan so‘ng yong‘in chiqqan.

Rossiyaning Belgorod viloyatida esa Ukraina droni xonadonga kelib urilishi oqibatida 11 yoshli bola jarohatlandi, deb xabar berdi mahalliy hokimiyat vakillari.

Rossiya Mudofaa vazirligiga ko‘ra, tunda Ukraina tomonidan uchirilgan jami 148 ta dron urib tushirilgan. Rossiya tomonidan bosib olingan Qrimdagi Sevastopol uzra ham havo hujumidan mudofaa tizimlari dron hujumlarini qaytargan.

To‘rt yildan ortiq vaqt davom etayotgan urushda Rossiya Ukrainaning energiya ta’minoti va infratuzilmalarini nishonga olib kelmoqda, Ukraina esa joriy yilda Rossiya neft obektlariga hujumlarini kuchaytirdi. Har ikki tomon ham tinch aholini nishonga olayotganini rad etadi.

Ukrainadagi urush Rossiya 2022 yil fevralida keng ko‘lamli bosqinni boshlaganidan beri davom etmoqda. Uni tugatish borasidagi sa’y-harakatlar deyarli siljimadi. AQSh prezidenti Donald Tramp ma’muriyati e’tiborini ko‘proq Yaqin Sharqdagi mojarolarga qaratgan.