AQSh va Eron o‘rtasida zarbalar almashinuvi davom etmoqda

AQSh qurolli kuchlari Markaziy qo‘mondonligi (CENTCOM) amerikalik harbiylar Eronning Kuvayt va Bahrayn bo‘ylab uchirgan raketalarini to‘xtatgani haqida xabar berdi.

AQSh harbiylariga ko‘ra, 3 iyunga o‘tar kechasi Eron Kuvaytga ikkita ballistik raketa uchirgan, ular nishonga yeta olmagan «yoki parvoz chog‘ida zararsizlantirilgan». Bahrayn yo‘nalishidagi uchta raketa ham urib tushirilgan.

Bunga javoban AQSh harbiylari «o‘z-o‘zini mudofaa qilish maqsadida» Eronning Keshm orolida joylashgan qo‘mondonlik punktiga zarba bergan.

Eron Islom inqilobi muhofizlari korpusi raketalar va dronlar orqali Amerikaning mintaqadagi bazalaridan biriga va vertolyotlariga, shuningdek, AQSh harbiy-dengiz kuchlarining Beshinchi operativ floti qo‘mondonlik markaziga (Bahraynda joylashgan) zarba berganini ma’lum qilgan.

Eron buni AQShning Keshm orolidagi aloqa minorasiga bergan zarbasiga javob deb atadi.

Reuters Kuvayt davlat agentligiga tayanib xabar berishicha, 3 iyun tongida Eron mamlakat xalqaro aeroportiga hujum qilgan, binoga «jiddiy zarar yetgan». «Al-Jazira» telekanali hujum oqibatida jabrlanganlar borligini xabar qilgan, ammo ularning soniga aniqlik kiritilmagan. Kuvayt aeroporti faoliyati bir kunga to‘xtatilgan.

Axios nashri yozishicha, AQSh va Eron vakillari o‘t ochishni to‘xtatish rejimini 60 kunga uzaytiradigan va Eron yadroviy dasturi bo‘yicha muzokaralarni boshlashga imkon beradigan o‘zaro anglashuv memorandumi loyihasini kelishib olgan. 1 iyun kuni Eronning Tasnim agentligi Tehron Isroilning «Hizbulloh» obektlari joylashgan Livanga zarbalari tufayli AQSh bilan muzokaralardan chiqayotgani haqida xabar berdi. AQSh prezidenti Donald Tramp ko‘p o‘tmay Isroil va Livan bilan o‘zaro hujumlarni to‘xtatish bo‘yicha kelishuvga erishgani va AQSh-Eron muzokaralari davom etishini ta’minlaganini ma’lum qildi.