AQSh Markaziy qo‘mondonligi (CENTCOM) ma’lum qilishicha, 9 iyun kuni Eronning Ho‘rmuz bo‘g‘ozi atrofidagi havo mudofaasi tizimlari, radiolokatsiya stansiyalari va boshqaruv obektlariga qarshi harbiy amaliyot o‘tkazilgan.
Qo‘mondonlik bu harakatni amerikalik Apache jangovar vertolyotining yo‘qotilishiga nisbatan «mutanosib javob» deb baholagan.
AQSh prezidenti Donald Tramp ham ABC News telekanaliga bergan intervyusida mazkur qarorni himoya qildi.
«Javob juda kuchli va qat’iy bo‘lishi kerak edi. Hozir aynan shunday bo‘lmoqda», — dedi Tramp.
Eron janubida portlashlar haqida xabarlar tarqaldi
Amerikaning Axios nashri ma’lumotlariga ko‘ra, zarbalarning asosiy nishonlari Ho‘rmuz bo‘g‘ozi yaqinida joylashgan Eron havo mudofaasi tizimlari va radar obektlari bo‘lgan.
Eron ommaviy axborot vositalari mamlakat janubiy sohillarida bir nechta portlashlar sodir bo‘lganini xabar qildi. Tasnim agentligiga ko‘ra, Sirik va Minab shaharlari hamda Keshm oroli hududida kuchli portlash ovozlari eshitilgan.
Eron tashqi ishlar vaziri Abbos Araqchi AQSh harakatlarini keskin qoralab, javob choralari ko‘rilishini ma’lum qildi.
Uning ta’kidlashicha, Eron qurolli kuchlari mamlakat xavfsizligiga qarshi qaratilgan har qanday tahdid yoki hujumni javobsiz qoldirmaydi.
Keyinroq Islom inqilobi muhofizlari korpusi (IIMK) AQShning mintaqadagi obektlariga qarshi raketalar va uchuvchisiz apparatlar ishga tushirilganini ma’lum qildi.
AQSh operatsiya yakunlanganini bildirdi
Bir necha soatdan keyin CENTCOM harbiy amaliyot tugallanganini e’lon qildi.
Ma’lum qilinishicha, AQSh kuchlari Eronning havo mudofaasi obektlari, yerdagi boshqaruv punktlari va radiolokatsiya tizimlariga aniq zarbalar bergan.
Apache vertolyoti qanday halokatga uchragan?
Avvalroq Donald Tramp o‘zining Truth Social tarmog‘ida Eronga qarshi javob choralari ko‘rilishini ma’lum qilgan edi.
