Jyenevada O‘zbekistonning bolalar mehnatiga qarshi kurashdagi yutuqlari yuqori baholandi

12 iyun – Butunjahon bolalar mehnatiga qarshi kurashish kuni munosabati bilan “Bolalar mehnatiga qizil kartochka: Marokashdan amaliy harakatlargacha” mavzusida xalqaro tadbir bo‘lib o‘tdi. Unda O‘zbekiston delegatsiyasi faxriy mehmon sifatida ishtirok etdi.

Tadbirda bolalar mehnatiga barham berish bo‘yicha xalqaro sa’y-harakatlarni kuchaytirish, ta’lim va ijtimoiy himoya tizimlarini rivojlantirish hamda davlatlar o‘rtasidagi hamkorlikni kengaytirish masalalari muhokama qilindi.

Anjumanda Oliy Majlis Senati raisi, Odam savdosiga qarshi kurashish va munosib mehnat masalalari bo‘yicha milliy komissiya raisi Tanzila Narbayeva O‘zbekistonda mehnat, ta’lim va ijtimoiy himoya sohalarida amalga oshirilayotgan islohotlar natijalari haqida taqdimot qildi. U o‘z nutqida mamlakatda bolalar mehnatini deyarli to‘liq bartaraf etishga erishilganini ta’kidlab, bu natija qat’iy siyosiy iroda, samarali ijtimoiy himoya mexanizmlari va xalqaro hamkorlik samarasi ekanini qayd etdi.

Xalqaro mehnat konferensiyasida ishtirok etgan 187 davlat vakillari e’tiboriga O‘zbekistonda mehnat, ijtimoiy himoya va ta’lim sohalarida amalga oshirilgan keng ko‘lamli islohotlar natijalari havola etildi. Mamlakatimizda bolalar mehnatining deyarli to‘liq bartaraf etilgani xalqaro hamjamiyat tomonidan alohida e’tirof etildi.

Konferensiya doirasida Tanzila Narbayeva Xalqaro mehnat tashkiloti, Xalqaro kasaba uyushmalari konfederatsiyasi, Xalqaro ish beruvchilar tashkiloti hamda boshqa nufuzli xalqaro tuzilmalar rahbarlari bilan qator uchrashuvlar o‘tkazdi. Muloqotlarda mehnat munosabatlarini takomillashtirish, ijtimoiy himoyani kuchaytirish, xalqaro mehnat standartlarini milliy qonunchilikka joriy etish va hamkorlikni yanada kengaytirish masalalari muhokama qilindi.

Shuningdek, Xalqaro mehnat tashkiloti Bosh direktori Jilber Ungbo bilan uchrashuvda hamkorlikning bugungi holati va istiqbollari ko‘rib chiqildi. XMT rahbari O‘zbekistonning konferensiyadagi faol ishtirokini yuqori baholab, mehnat va ijtimoiy himoya sohalarida amalga oshirilayotgan islohotlar natijalarini e’tirof etdi.

Jyenevada bo‘lib o‘tgan uchrashuvlar O‘zbekistonning mehnat va ijtimoiy himoya sohasidagi islohotlari xalqaro tashkilotlar tomonidan keng qo‘llab-quvvatlanayotganini yana bir bor tasdiqladi.