Prezident investorlarga yangi huquqiy imkoniyatlarni taqdim etdi

Beshinchi Toshkent xalqaro investitsiya forumida prezident Shavkat Mirziyoyev investorlar huquqlarini himoya qilish va kapital bozorini rivojlantirishga qaratilgan qator yangi tashabbuslarni e’lon qildi. Ular orasida Toshkent xalqaro moliya markazini tashkil etish, mustaqil xalqaro tijorat sudini yo‘lga qo‘yish hamda maxsus huquqiy rejimlarni joriy etish rejalari bor.

Foto: Prezident matbuot xizmati

Prezidentning ta’kidlashicha, investorlar uchun huquqiy kafolatlarni kuchaytirish maqsadida Toshkent xalqaro moliya markazi tashkil etiladi. Unda Angliya huquqiga asoslangan maxsus huquqiy tartib joriy qilinib, nufuzli xorijiy sudyalar ishtirokida mustaqil Toshkent xalqaro tijorat sudi faoliyat ko‘rsatadi.

Shuningdek, investitsion mediatsiya tizimi rivojlantirilib, O‘zbekiston BMTning Mediatsiya to‘g‘risidagi Singapur konvensiyasiga qo‘shilishni rejalashtirmoqda. Bu investorlarga mamlakatning o‘zida xalqaro huquqiy himoya mexanizmlaridan foydalanish imkonini beradi.

Forumda kapital bozorini rivojlantirish va muqobil moliya vositalarini kengaytirish choralari ham ma’lum qilindi. Jumladan, xalqaro kliring kompaniyalari uchun yangi imkoniyatlar yaratilishi, suveren islom obligatsiyalari — sukuk dasturining ishga tushirilishi va yirik davlat aktivlarini xususiylashtirish jarayonlari davom ettirilishi qayd etildi.

Prezident, shuningdek, yuqori qo‘shilgan qiymatli sanoat loyihalari, «yashil» energetika, data-markazlar va sun’iy intellekt sohalariga investitsiyalar jalb qilish bo‘yicha yangi imkoniyatlarni taqdim etib, mahalliy va xorijiy investorlarni ushbu loyihalarda faol ishtirok etishga chaqirdi.