Prezident matbuot kotibi Sherzod Asadovning maʼlum qilishicha, Shavkat Mirziyoyev turar joy qurish bilan shaharga xizmat qiladigan mehmonxona yoki savdo markazini barpo etishning iqtisodiy yuki bir xil emasligini taʼkidlagan.
Shunga koʻra, infratuzilma toʻlovining bazaviy stavkasi:
savdo, servis va biznes markazlari uchun - 3 barobar;
mehmonxona va turizm obyektlari uchun - 5 barobar;
madaniy va koʻngilochar maskanlar uchun - 10 barobar kamaytiriladi.
Xususiy bogʻcha, maktab va shifoxonalar uchun esa toʻlov 1 foiz etib belgilanadi.
Dunyoning yetakchi arxitektorlari ishlab chiqqan oʻziga xos loyihalarga tezkor tartib qoʻllanadi. Loyihalash, qurilish va obyektni foydalanishga qabul qilish jarayonlari jadallashtirilib, bir xil maʼlumotni qayta-qayta talab qilish amaliyotiga chek qoʻyiladi.
Muloqotda Yangi Toshkent haqiqiy «yashil shahar» boʻlishi shartligi ham taʼkidlangan. Qurilayotgan obyektlarga «yashil bino» standartlari qoʻllanadi, biroq sertifikat olish tadbirkor uchun qoʻshimcha xarajat ekani inobatga olingan.
Shu bois qiymati 50 million dollardan yuqori boʻlgan noturar joy loyihalari uchun «yashil» sertifikat olish xarajatlari davlat tomonidan toʻliq qoplanadi.
Shuningdek, investor sotib olgan har bir yer maydonining 30 foizini yashil hududga aylantirish talabi Yangi Toshkentdagi loyihalarga qoʻllanmaydi. Shahar hududining 30 foizini koʻkalamzorlashtirish bosh reja asosida davlat tomonidan taʼminlanadi.
Yirik investorlar bilan ishlashda ham yangi yondashuv joriy etiladi. Qiymati 50 million dollardan yuqori har bir loyihaga alohida masʼul biriktiriladi. U obyekt ishga tushguniga qadar investorga hamrohlik qilib, yuzaga keladigan masalalarni hal etishga koʻmaklashadi.
