Qoʻshimcha funksionallar
-
Tungi ko‘rinish
Mayning zonasi rezidentlari uchun yangi qoidalar tasdiqlandi
Qoraqalpog‘iston Respublikasi hududida tashkil etilgan Besqala Mining Valley maxsus mayning zonasi rezidentlarini ro‘yxatdan o‘tkazish va ularning faoliyatini amalga oshirish tartibi rasman tasdiqlandi. Yangi nizom mayning faoliyatini tashkil etish, rezident maqomini berish va elektr energiyasidan foydalanish shartlarini belgilaydi.
Adliya vazirligi tomonidan Besqala Mining Valley maxsus mayning zonasi rezidentlarini ro‘yxatdan o‘tkazish va ularning faoliyatini amalga oshirish tartibi to‘g‘risidagi nizom davlat ro‘yxatidan o‘tkazildi (3893-son, 2026 yil 8 iyul).
Nizomga ko‘ra, maxsus mayning zonasining hududi Qoraqalpog‘iston Respublikasining butun hududini qamrab oladi.
Maxsus zona rezidenti maqomini faqat Qoraqalpog‘iston Respublikasida davlat ro‘yxatidan o‘tgan va faoliyat yuritayotgan yuridik shaxslar olishi mumkin.
Rezident sifatida ro‘yxatdan o‘tish uchun arizalarni ko‘rib chiqishda davlat boji yoki boshqa yig‘im undirilmaydi. Arizani qanoatlantirish yoki rad etish to‘g‘risidagi qaror hujjatlar taqdim etilgan kundan boshlab 30 kun ichida qabul qilinadi.
Shuningdek, maxsus mayning zonasi hududida kriptoaktivlar mayningi bilan shug‘ullanish uchun yagona elektr energetikasi tizimidan olinadigan elektr energiyasidan foydalanishga ruxsat berilgan.
Biroq mazkur faoliyat uchun iste’mol qilingan elektr energiyasi haqi amaldagi tarifga nisbatan ikki baravar oshiruvchi koeffitsiyent qo‘llangan holda hisoblanadi.
Mazkur tartib maxsus mayning zonasi faoliyatini huquqiy jihatdan tartibga solish, sohaga investitsiyalarni jalb qilish va kriptoaktivlar mayningi sohasini aniq qoidalar asosida rivojlantirishga qaratilgan.
