IIMK bayonotiga ko‘ra, AQSh armiyasi ta’siri ostida harakat qilgan uchta neft tankeri Ho‘rmuz bo‘g‘ozining janubidagi minalashtirilgan yo‘lak orqali o‘tishga uringan.
Bayonotda aytilishicha, tankerlardan biri portlab, unda kuchli yong‘in chiqqan. Shundan so‘ng qolgan ikki kema ortga qaytgan.
IIMK o‘z harbiy-dengiz kuchlari AQSh mintaqada “tajovuzkor harakatlarini“ davom ettirayotgan ekan, Ho‘rmuz bo‘g‘ozini to‘sib turishda davom etishini bildirdi. Shuningdek, Eron bilan kelishmasdan bo‘g‘ozdan o‘tishga uringan har qanday kema portlagan tanker taqdiriga duch kelishi haqida ogohlantirildi.
FT: Georgios Prokopiuga tegishli tanker Eron tomonidan olib ketilgan bo‘lishi mumkin
23 iyul kuni ertalab Financial Times sun’iy yo‘ldosh tasvirlariga tayanib, grek tadbirkori va dengiz tashuv kompaniyalari egasi Georgios Prokopiuga tegishli Kavomaleas tankeri Eron suvlariga buksir qilingan bo‘lishi mumkinligini xabar qildi.
Nashr ma’lumotiga ko‘ra, tanker 19 iyul kechqurun Ho‘rmuz bo‘g‘ozida o‘qqa tutilgan. Kema O‘mondan yo‘lga chiqqan bo‘lib, Fors ko‘rfazi tomon harakatlanayotgan paytda unga ikkita snaryad tekkan.
Hujum oqibatida mashina bo‘limida yong‘in chiqqan va ekipaj kemani tark etishga majbur bo‘lgan.
Yevropa kosmik agentligi (ESA)ning 21 iyuldagi sun’iy yo‘ldosh tasvirlarida o‘lchami va palubasi rangi Kavomaleas tankeriga mos keladigan kema Eron hududiy suvlarida, Larak oroli yaqinida turgani aks etgan. Suratlarda uning mashina bo‘limidan tutun ko‘tarilayotgani ham ko‘rinadi.
Financial Times ta’kidlashicha, tanker hujumga uchragan dengiz hududi hozir bo‘sh. Tahlilchilar yuqori ehtimol bilan kema Eron tomonidan qo‘lga olingan deb hisoblamoqda.
Nashr ma’lumotiga ko‘ra, tanker Fors ko‘rfazida 500 ming barreldan ortiq neft yukini qabul qilishi kerak edi. Sun’iy yo‘ldosh tasvirlarida hujumga uchragan kema ortidan neft izi ham ko‘rinadi.
Tanker egasi bo‘lgan Dynacom kompaniyasi kemaga nisbatan hech qanday ko‘chirish yoki buksirlashga ruxsat bermaganini bildirdi. Kompaniya hozirda tankerning qayerdaligini aniqlashga urinmoqda.
Ho‘rmuz bo‘g‘ozida tankerlarga hujumlar
Financial Times ma’lumotiga ko‘ra, AQSh va Isroilning Eronga qarshi urushi davomida Ho‘rmuz bo‘g‘ozida jami 45 ta kema turli hujumlarga uchragan. Nashr qayd etishicha, Kavomaleas bilan bog‘liq holat mojaro boshlanganidan beri Eron tomonidan kema qo‘lga olingani haqidagi uchinchi ehtimoliy holat hisoblanadi.
