Brent fyucherslari narxi bir barrel uchun 100 dollardan pastga tushgan boʻlsa-da, yoqilgʻi narxi hamon rekord koʻrsatkichlarga yaqin darajada qolmoqda. Yaqin Sharqdan hozir asosan xom neft olib chiqilmoqda, chunki Eron zarbalari oqibatidagi zararlanishlar va yangi hujumlar xavfi sabab mintaqadagi koʻplab neftni qayta ishlash zavodlari yopiqligicha qolmoqda. Shu bois dunyoda neft mahsulotlari tanqisligi hamon saqlanib turibdi.
The Wall Street Journal gazetasining Kpler maʼlumotlariga tayanib xabar berishicha, 21-sentabrdan 27-sentabrgacha boʻlgan bir hafta ichida mintaqadan 160 million barreldan ortiq, yaʼni sutkasiga 23,3 million barrel neft eksport qilingan. Xuddi shunday hajm fevral oyining birinchi yarmida ham tashilgan edi. Biroq ayni paytda eksportning qariyb 55 foizi Eron toʻsishga tobora muvaffaqiyatsiz urinayotgan Hoʻrmuz boʻgʻozi ostonasidagi Oʻmon koʻrfazidan hamda Saudiya Arabistoni quvur orqali neft yetkazib berayotgan Qizil dengizdan amalga oshirilmoqda. Urushdan avval esa neftning 80 foizdan ortigʻi aynan Hoʻrmuz orqali joʻnatilar edi.
Reuters agentligining qoʻshimcha qilishicha, sentabr oyida 14 kun davomida barcha yoʻnalishlar boʻyicha mintaqaviy eksport urushdan oldingi darajadan yuqori boʻlgan. Holbuki, urush boshlangunga qadar bir yil davomida bu koʻrsatkich sutkasiga 18 million barrelni tashkil etgan edi. Kpler tahlilchilariga koʻra, taʼminot hajmining yaqinda birdaniga oʻsishi Saudiya Arabistonining bozordagi oʻz ulushini tiklash maqsadida Hoʻrmuz orqali tankerlarda neft tashishni faollashtirgani hamda 10-sentabr kuni Iroq hududidan Eron qoʻllovidagi jangarilar tomonidan berilgan zarbadan soʻng qayta tiklangan quvur orqali neft haydashni koʻpaytirgani bilan izohlanadi.
Brent fyucherslari sentabr oyining birinchi yarmidan buyon deyarli butun vaqt davomida bir barrel uchun 100 dollardan yuqori baholandi. Biroq seshanba kuni ularning narxi 98,1 dollargacha pasaydi. Bunga saudiyaliklar tomonidan qoʻllab-quvvatlanuvchi Yaman hukumat qoʻshinlarining Qizil dengizga kemalar kiradigan Bob al-Mandib boʻgʻozi qirgʻoqlarini qaytarib olgani toʻgʻrisidagi xabarlar turtki boʻldi. Natijada Eron homiyligidagi husiylar guruhi sentabrda egallab olgan va kemalar qatnovini nazorat qilish imkonini bergan hududlarning aksariyat qismidan chekintirildi.
Soha vakillarining WSJ nashriga bildirishicha, AQSH neft kompaniyalari rahbarlari Hoʻrmuz boʻgʻozidan oʻtayotgan kemalarni Eron oʻqqa tutishidan himoya qilayotgan AQSH harbiy-dengiz kuchlaridan neft mahsulotlari ortilgan tankerlarni kuzatib borishga koʻproq eʼtibor qaratishni iltimos qilmoqda. Hozirgacha AQSH asosan qariyb 2 million barrel xom neft tashish quvvatiga ega supertankerlarga koʻmaklashib kelayotgan edi.
