Jahon banki har yili mamlakatlarni aholi jon boshiga to‘g‘ri keladigan yalpi milliy daromad (GNI) asosida qayta tasniflaydi. Bu ko‘rsatkich mamlakatlarning iqtisodiy rivojlanish darajasini baholashda qo‘llanadi va har yili daromad chegaralari yangilanib boradi.

Joriy tasnifga ko‘ra, mamlakatlar to‘rt guruhga bo‘lingan:

past daromadli - aholi jon boshiga yillik yalpi milliy daromad 1 175 AQSh dollarigacha;

o‘rtadan past daromadli - 1 176 dollardan 4 635 dollargacha;

o‘rtadan yuqori daromadli - 4 636 dollardan 14 375 dollargacha;

yuqori daromadli - 14 375 dollardan yuqori.

Infografikada dunyo mamlakatlari iqtisodiy rivojlanishining juda notekis ekani yaqqol ko‘rinadi. G‘arbiy va Markaziy Afrikadagi ko‘plab davlatlar past daromadli mamlakatlar qatoriga kiritilgan. Shuningdek, Yaman, Suriya, Afg‘oniston va Shimoliy Koreya ham ushbu guruhdan o‘rin olgan.

Yuqori daromadli mamlakatlar qatoriga esa Yevropa davlatlarining aksariyati, jumladan Rossiya, shuningdek, Avstraliya, Yangi Zelandiya, AQSh, Kanada, Yaqin Sharqning ayrim davlatlari hamda Markaziy va Janubiy Amerikaning Panama, Chili va Urugvay kabi mamlakatlari kiritilgan.

Dunyoning yirik iqtisodiyotlaridan bo‘lgan Xitoy va Braziliya o‘rtadan yuqori daromadli davlatlar toifasiga kiritilgan bo‘lsa, aholi soni bo‘yicha dunyoda birinchi o‘rinda turuvchi Hindiston o‘rtadan past daromadli mamlakatlar guruhida qolgan.

Yangilangan reytingda bir qator davlatlar o‘z maqomini yaxshiladi. Xususan, Iordaniya, Mikroneziya, Filippin, Shri-Lanka va Vetnam o‘rtadan past daromadli mamlakatlar toifasidan o‘rtadan yuqori daromadli mamlakatlar qatoriga o‘tdi.

Togo esa past daromadli mamlakatlar guruhidan chiqib, o‘rtadan past daromadli davlatlar qatoriga qo‘shildi.