«Xavfsiz va sog‘lom yurt» tezkor-profilaktik tadbirlari doirasida Davlat xavfsizlik xizmati xodimlari «Toshkent-Aero» ixtisoslashtirilgan bojxona kompleksi bilan hamkorlikda xorijdan olib kelingan yirik miqdordagi sintetik narkotik moddaning mamlakatga olib kirilishiga chek qo‘ydi.
Ma’lum qilinishicha, «Bangkok–Sharja–Toshkent» aviaqatnovi orqali kelgan 1994 yilda tug‘ilgan Qozog‘iston fuqarosining qo‘l yuklari tekshirilganda, 8 dona turli xil shirinliklar qadog‘i va 5 dona plastmassa idish ichiga yashirilgan jami 4,4 kilogramm «mefedron» sintetik narkotik moddasi aniqlangan.
Shundan so‘ng o‘tkazilgan tezkor tadbir davomida internet orqali faoliyat yurituvchi narkodo‘kon boshqaruvchisining topshirig‘i bilan ushbu giyohvandlik vositasini poytaxtdagi mehmonxonalardan birida qabul qilib olgan Yangiyo‘l shahrida yashovchi, 2006 yilda tug‘ilgan shaxs ham ushlandi.
Tekshiruv jarayonida mahalliy fuqaro yonidan pnevmatik pistolet ham topilib, belgilangan tartibda rasmiylashtirib olindi.
Hozirda mazkur shaxslarga nisbatan Jinoyat kodeksining 246-moddasi 2-qismi bilan jinoyat ishi qo‘zg‘atilib, ularga nisbatan «qamoq» ehtiyot chorasi qo‘llandi. Ayni paytda tergov harakatlari davom etmoqda.
