Bosh prokuratura huzuridagi Departament tomonidan o‘tkazilgan tergovga qadar tekshiruvda HST, VEK va RBMT MChJ mansabdor shaxslari hamda boshqa shaxslar Telegram ijtimoiy tarmog‘idagi xalqaro TESLA SHOP guruhiga tegishli 58 ta Telegram-bot orqali narkotik va psixotrop moddalarning noqonuniy savdosini amalga oshirgani aniqlangan.
Tergov ma’lumotlariga ko‘ra, mazkur savdodan tushgan 20,9 milliard so‘m 14 nafar xorijiy fuqaro nomiga O‘zbekiston banklarida ochilgan 90 ta soxta (drop) bank kartasiga o‘tkazilgan. Shuningdek, 8 milliard so‘m Paynet faoliyati bilan shug‘ullanuvchi HST va VEK MChJga, yana 4,7 milliard so‘m esa CP kripto-do‘koniga yo‘naltirilgan.
Aniqlanishicha, keyinchalik ushbu va boshqa mablag‘lar jamiyatlar hisob raqamlariga o‘tkazilib, ular orqali aholiga 621,2 milliard so‘mlik Paynet xizmatlari ko‘rsatilgan. Natijada 90,3 milliard so‘m miqdoridagi soliq to‘lovlarini to‘lashdan bo‘yin tovlangan.
Bundan tashqari, jinoiy faoliyatdan olingan daromadlar hisobidan 50,5 million AQSh dollari miqdorida noqonuniy kriptoaktivlar aylanmasi amalga oshirilgan. Shundan 2,4 million AQSh dollariga teng kriptoaktivlar 14 nafar xorijiy fuqaroning valyuta hisob raqamlariga o‘tkazilib, jinoiy yo‘l bilan topilgan daromadlar legallashtirilgani ma’lum qilindi.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan. Hozirda tergov harakatlari olib borilmoqda.
