27–28-iyul kunlari boʻlib oʻtgan JSTning Oʻzbekistonning aʼzoligi boʻyicha Ishchi guruhi yigʻilishida mamlakat delegatsiyasi Jahon savdo tashkilotiga qoʻshilish jarayonini 2026-yil davomida yakunlash rejasi oʻz kuchida qolishini maʼlum qildi.

Oʻzbekiston prezidentining JST masalalari boʻyicha vakili va bosh muzokarachi Azizbek Urunovning taʼkidlashicha, aʼzolik jarayoni oxirgi yigʻilishdan buyon yanada ilgarilagan. Uning qayd etishicha, aʼzo davlatlar tomonidan berilayotgan savollar soni kamayib bormoqda, bu esa Oʻzbekiston ularning asosiy eʼtiroz va takliflarini bosqichma-bosqich hal etayotganini koʻrsatadi.

Maʼlum qilinishicha, mart oyidan buyon Oʻzbekiston JST qoidalariga muvofiqlashtirish maqsadida 190 ta normativ-huquqiy hujjatni qabul qildi. Jumladan, sanitariya va fitosanitariya talablari, oziq-ovqat xavfsizligi sohasidagi qonunchilik takomillashtirildi hamda yagona Oziq-ovqat xavfsizligi qoʻmitasi tashkil etildi. Shuningdek, dempingga qarshi, kompensatsiya va himoya choralariga oid qonun loyihalari yangilandi.

JST Ishchi guruhi raisi Son Gyo Choyning maʼlum qilishicha, hozirga qadar Oʻzbekiston 31 ta ikki tomonlama bozorga kirish kelishuvini imzolagan. Ulardan eng soʻnggisi Hindiston bilan tuzilgan boʻlib, mazkur yoʻnalishdagi muzokaralar deyarli yakuniy bosqichga yetgan.

Yigʻilishda JSTga aʼzo davlatlar Oʻzbekistonda davlat korxonalarini xususiylashtirish, biznes muhitining shaffofligini oshirish va iqtisodiy islohotlarni yuqori baholadi. Shu bilan birga, valyuta siyosati, importni tartibga solish, investitsiyalar, raqobat siyosati, texnik reglamentlar va qishloq xoʻjaligini davlat tomonidan qoʻllab-quvvatlash kabi yoʻnalishlarda qoʻshimcha islohotlarni davom ettirish tavsiya etildi.

JST rahbariyati ham Oʻzbekiston va aʼzo davlatlarning muzokaralarni jadal surʼatlarda davom ettirayotganini yuqori baholab, qolgan masalalar oʻz vaqtida hal etilsa, mamlakatning tashkilotga aʼzo boʻlishiga erishish mumkinligini taʼkidladi.

Bu Oʻzbekistonning JSTga aʼzoligi boʻyicha Ishchi guruhining 13-yigʻilishi boʻldi. Mamlakat JSTga aʼzo boʻlish uchun 1994-yilda ariza bergan boʻlsa, aʼzolik shartlari boʻyicha faol muzokaralar 2020-yildan buyon olib borilmoqda.