Toshkent viloyatining O‘rtachirchiq tumanida voyaga yetmagan qizga buzuq harakatlar sodir qilishda gumonlangan erkak qamoqqa olindi. Bu haqda Bolalar ombudsmani xabar berdi.
Ma’lum qilinishicha, Bolalar ombudsmani kotibiyatiga O‘rtachirchiq tumanida yashovchi O.S.dan murojaat kelib tushgan. U murojaatida ushbu tumanda yashovchi M.A. tomonidan voyaga yetmagan farzandi Q.M.ga nisbatan uyatsiz harakatlar sodir qilinganini bildirgan.
Bolalar ombudsmani so‘rovi asosida mazkur holat prokuratura organlari tomonidan o‘rganilgan. Prokuror nazorati doirasida jinoyat ishini qo‘zg‘atishni rad etish to‘g‘risida avvalroq qabul qilingan qaror bekor qilinib, holat yuzasidan qo‘shimcha tergovga qadar tekshiruv harakatlari olib borilgan.
Natijada, M.A.ga Jinoyat kodeksining 129-moddasi (o‘n olti yoshga to‘lmagan shaxsga nisbatan uyatsiz-buzuq harakatlar qilish) 3-qismi bilan ayblov e’lon qilingan. Erkakka nisbatan qamoqqa olish tarzidagi ehtiyot chorasi qo‘llangan.
Hozirda jinoyat ishi yuzasidan dastlabki tergov harakatlari olib borilmoqda.
