5-avgust kuni Xitoyning Shandun provinsiyasi qirg‘oqlari yaqinidagi dengiz start platformasidan “Samarqand-2028” giperspektral sun’iy yo‘ldoshi orbitaga uchirildi.
“Samarqand-2028» Xitoyning STAR.VISION kompaniyasi tomonidan yaratilgan Yerni masofadan zondlashga mo‘ljallangan giperspektral sun’iy yo‘ldosh bo‘lib, loyiha “O‘zbekkosmos” agentligi bilan hamkorlikda amalga oshirildi.
Qayd etilishicha, kompaniyaning xalqaro loyihalari tarixida ilk bor “O‘zbekkosmos” agentligi muhandislari tomonidan ishlab chiqilgan sun’iy intellekt moduli sun’iy yo‘ldoshning bort tizimiga integratsiya qilindi.
Sun’iy intellekt moduli sun’iy yo‘ldosh tomonidan olingan tasvir va ma’lumotlarni Yerga uzatilishidan oldin bevosita orbitaning o‘zida qayta ishlaydi. Natijada uzatiladigan ma’lumotlar hajmi kamayadi, kerakli axborot tezkor olinadi va keyingi tahlil jarayonlari samaradorligi sezilarli darajada oshadi.
Olingan ma’lumotlardan qishloq xo‘jaligi, ekologiya, tabiiy resurslarni monitoring qilish va boshqa yo‘nalishlarda foydalanish rejalashtirilgan.
Mazkur sun’iy yo‘ldoshga “Samarqand-2028” nomi Avstraliyaning Sidney shahrida bo‘lib o‘tgan Xalqaro astronavtika kongressida 2028-yilgi kongressni Samarqand shahrida o‘tkazish to‘g‘risida qabul qilingan qaror sharafiga tanlangan.
