Biznes-ombudsman Ma’muriy javobgarlik to‘g‘risidagi kodeksdagi normaning konstitutsiyaga muvofiqligini tekshirishni so‘rab, konstitutsiyaviy sudga murojaat bilan chiqdi. Bu haqda Biznes-ombudsman axborot xizmati xabar berdi.
Ma’lum qilinishicha, prezident huzuridagi Tadbirkorlik sub’yektlarining huquqlari va qonuniy manfaatlarini himoya qilish bo‘yicha vakil devoni tomonidan yakka tartibdagi tadbirkor Sh.R.ning murojaati o‘rganilgan.
Unga ko‘ra, 2025-yil 28-may kuni tadbirkorga tegishli mebel ishlab chiqarish korxonasida yong‘in sodir bo‘lgan. Voqea yuzasidan jinoyat ishi qo‘zg‘atish rad etilib, tadbirkor Ma’muriy javobgarlik to‘g‘risidagi kodeksning 211-moddasi 3-qismi (yong‘in xavfsizligi qoidalarini buzish) bo‘yicha javobgarlikka tortilgan hamda 750 ming so‘m miqdorda jarima qo‘llanilgan.
Ushbu qaror kassatsiya hamda Oliy sudning taftish instansiyasi tomonidan o‘zgarishsiz qoldirilgan. Ma’muriy javobgarlik to‘g‘risidagi kodeksning 324-39-moddasiga ko‘ra, taftish tartibidagi qaror uzil-kesil hisoblanib, u boshqa hech qanday sud instansiyasi tomonidan qayta ko‘rib chiqilishi mumkin emas.
“Shu bilan birga, xuddi shu voqea bo‘yicha alohida yuritilgan tekshiruv natijasida taftish instansiyasi qarori chiqqanidan keyin (2026-yil iyun oyida) sud-ekspertiza xulosasi va yakuniy tergov qarori qabul qilingan. Unga ko‘ra, yong‘inning sababi mebel korxonasining elektr tarmog‘idagi avariya holati bo‘lgani va bu holat tadbirkorning aybi yoki qasddan qilingan harakatlari bilan bog‘liq emasligi ob’yektiv tarzda aniqlangan.
Amaldagi normaning uzil-kesillik qoidasi sababli ushbu yangi, tadbirkorning aybsizligini tasdiqlovchi dalillar hech qanday sud instansiyasi tomonidan ko‘rib chiqilmagan. Oqibatda 750 ming so‘mlik ma’muriy jarima to‘g‘risidagi qaror bugungi kunga qadar kuchda qolmoqda”, deyiladi xabarda.
Vakil devoni ushbu holatni konstitutsiyasining aybsizlik prezumpsiyasi (28-modda), inson huquq va erkinliklarini ta’minlash davlatning oliy maqsadi ekanligi (54-modda) hamda har kimning huquqlarini xolis sud orqali himoya qilish va buzilgan huquqlarni tiklash huquqi (55-modda) qoidalariga muvofiqligi nuqtai nazaridan baholanishi zarur, deb hisoblamoqda.
Shunga asosan, Biznes-ombudsman Konstitutsiyaviy sudga rasmiy murojaat yo‘llagan. Unda Ma’muriy javobgarlik to‘g‘risidagi kodeksning 324-39-moddasini Konstitutsiyaning 28, 54 va 55-moddalariga muvofiqligini tekshirish so‘ralgan.
