Prezidentning “Xavfli chiqindilarni boshqarish samaradorligini oshirish chora-tadbirlari to‘g‘risida”gi qarori qabul qilindi.
Unga ko‘ra, 2027-yil 1-yanvardan boshlab xavfli chiqindilarni hosil qiluvchi yuridik shaxslar ekologik ekspertiza xulosasi asosida xavfli chiqindilarni boshqarish bo‘yicha yillik rejalar ishlab chiqadi va ularni Chiqindilarni boshqarish va tsirkulyar iqtisodiyotni rivojlantirish agentligining hududiy boshqarmalari bilan kelishadi.
Yillik rejalarda xavfli chiqindilar hajmini kamaytirish, ularni qayta ishlash ulushini oshirish, xavfsiz joylashtirish hamda chiqindilarni qayta ishlash, zararsizlantirish, utilizatsiya qilish yoki ko‘mish uchun tegishli ruxsat va infratuzilmaga ega ixtisoslashgan tashkilotlarga topshirish kabi vazifalar nazarda tutiladi.
Shuningdek, foydalanishdan chiqarilgan xavfli chiqindilar saqlanayotgan maxsus inshootlar va ochiq maydonlar ularni ekologik qayta tiklash uchun zarur mablag‘lar bilan birga bepul asosda agentlikka o‘tkaziladi.
Qarorga muvofiq, 2026-yil 1 oktyabrdan xavfli chiqindilarni hosil qiluvchi tashkilotlar statistika hisobotlarini yil yakuniga ko‘ra shakllantirib boradi. Yangi choralar mamlakatda xavfli chiqindilarni boshqarish samaradorligini oshirish, qayta ishlash darajasini kengaytirish va atrof-muhit muhofazasini kuchaytirishga xizmat qilishi kutilmoqda.
