Migratsiya agentligi ma’lumotiga ko‘ra, tashkillashtirilgan tartibda xorijga ishga joylashtirish geografiyasi yana bir davlat - Fransiya hisobiga kengaymoqda.
Joriy yilning 12-iyun kuni Fransiyada mavsumiy qishloq xo‘jaligi ishlarida ishlash uchun nomzodlarni jalb qilish bo‘yicha e’lon berilgan. 1-iyul kuni esa talabgorlar fransuz ish beruvchilari ishtirokida onlayn suhbatdan o‘tgan.
Pilot loyiha doirasida jami 10 nafar nomzod fransuz ish beruvchisi tomonidan tanlab olingan.
Ularning dastlabki 6 nafari mehnat vizalarini olib bo‘lgan. Ular avgust oyida Fransiyaga yo‘l olib, mevalarni yig‘ish va saralash ishlarida ish boshlashi rejalashtirilgan.
Loyihaning keyingi bosqichida qolgan 4 nafar nomzod kuz oylarida Fransiyaga yuboriladi. Ular sabzavot yetishtirish va hosilni yig‘ish bilan bog‘liq mavsumiy ishlarda mehnat qilishi ko‘zda tutilgan.
Migratsiya agentligiga ko‘ra, bu O‘zbekiston fuqarolarini Fransiyaga tashkillashtirilgan tartibda ishga joylashtirish bo‘yicha ilk yo‘nalish va dastlabki pilot loyiha hisoblanadi.
Loyiha natijalari asosida kelgusida Fransiyadagi ish beruvchilar bilan hamkorlikni kengaytirish va o‘zbekistonliklar uchun ushbu mamlakat mehnat bozorida yangi ish imkoniyatlarini yaratish rejalashtirilgan.
