AQSh mediasi 2 kundan beri Tramp o‘tgan oy Turkiyadagi NATO sammitidan harbiy samolyotda yashirincha qaytib ketganini yoritarkan, prezident buni tasdiqladi. Ohayoga jo‘nashi oldidan u jurnalistlarga voqea haqida qisqa so‘zlab, faqat maxsus xizmat aytganidek qilganini bildirdi. Tahdid bor edi, deydi Tramp so‘zini yakunlarkan.
O‘tgan oy AQSh prezidenti Turkiyaga NATO sammiti uchun borib, ortga qaytayotganida Amerika maxsus xizmatlari prezidentga suiqasd rejalaridan xabar topgan. Taxminiy hujum oldini olish uchun Tramp Anqaradan maxsus operatsiya orqali olib ketilgan. Aytilishicha, Eron Trampga suiqasd rejalagan bo‘lishi mumkin edi.
Prezident ko‘rsatilganidek xizmat samolyotida bo‘lmagan. U samolyotga chiqqan va narigi tomondagi keytering yuk mashinasiga olib o‘tilib, harbiy samolyotga yetkazilgan. Tramp harbiy samolyot bilan Buyuk Britaniyagacha, so‘ngra o‘zining xizmat samolyotida Vashingtonga uchib ketgan.
Bu maxfiy operatsiya haqida The Washington Post gazetasi va uning ortidan deyarli barcha katta medialar yozdi. Hiyla-nayrang Eronning suiqasd tahdidi sabab o‘ylab topilgan. Ammo eng nozik masala – prezident bor deb ko‘rsatilgan va prezident chiqmagan samolyotda jurnalistlar hamda Oq uy amaldorlari bo‘lgan.
Rejadan xabardor bo‘lgan AQSh rasmiysi so‘zlariga ko‘ra, Eron bilan urushdan keyingi xavfsizlik xavotirlari sababli prezidentning qayerda ekanini sir saqlash buyurilgan hamda harbiy samolyot bilan Turkiyadan olib chiqib ketilgan.
Shunday qilib bir vaqtning o‘zida 3 ta samolyot Britaniyaga uchgan. Xavfsiz jihatidan kamchiliklari borligi sabab Tramp chiqmagan Qatar sovg‘asi bo‘lgan bort, Tramp chiqqandek qilib ko‘rsatilgan asosiy xizmat samolyoti va maxfiy tarzda S-32 harbiy samolyoti ham Britaniyaga uchgan. Tramp undan asosiy xizmat samolyotiga o‘tgan va Vashingtonga uchib ketgan.
Shundan so‘ng matbuotda nega Qatar sovg‘a qilgan yangi samolyotda uchilmagani keng muhokamalarga sabab bo‘lib, savollarni ko‘paytirdi. Oq uy va prezidentning o‘zi kuzdan boshlab bu bort takomillashtirilishi, bu esa 1-2 oygina vaqt olishini ma’lum qildi. Ular samolyot yuqori xavfsizlik talablariga javob bermasligini sabab qilib ko‘rsatishgan.
Washington Post gazetasi bu xabarni e’lon qilgach, Oq uy kommunikatsiyalar departamenti buni rad etmadi.
"Samolyot xavfsiz, ishonchli va prezidentlik missiyasi talablarini qondirish uchun zarur bo‘lgan eng ilg‘or texnologiyalar bilan jihozlangan", deydi harbiy-havo kuchlari Qatar sovg‘a qilgan bort haqida.
Maxfiy xizmatlar yashirin operatsiya borasidagi savollarga javob berganicha yo‘q. Senatorlar va Kongress a’zolari voqeadan dahshatga tushgani, Trampning e’lon qilinmagan sayohatlari dahshatli ekanini aytmoqda. Ularning fikricha, aslida nima bo‘lgani borasida ommaga tushuntirish berilishi kerak.
Vashingtonga uchgan reysda jurnalistlar oldiga chiqqan Trampdan media nima uchun samolyot oynalarini yopishni talab qilganini so‘ragan.
Siz biz kurashishimiz kerak bo‘lgan iflos odamlar tufayli ham xavfli reyddasiz, degan prezident. Uning qo‘shimcha qilishicha, Eronning o‘ldirilishi kerak bo‘lganlar ro‘yxatida Tramp birinchi o‘rinda turadi.
Ammo 11-avgust kuni prezident Ohayo shtatiga jo‘nashi avvalidan jurnalistlarga rostdanam bu voqea bo‘lganini, u maxsus xizmat ko‘rsatmasiga amal qilganini tasdiqladi.
Ular mening boshqa reysga, boshqa samolyotga chiqishimni xohlashdi. Xavfsizlik bir xil edi, lekin ular buni qilishimni xohlashdi, shuning uchun men buni qildim. Qandaydir tahdid bor edi, dedi Tramp masalaga qisqa to‘xtalib. Lekin aynan Erondan suiqasd rejasi borligini gapirishni xohlamadi.
