Moskvaning Basmanniy tuman sudi AQSh 35-prezidenti Jon Kennedining jiyan-nevarasi, amerikalik Konor Kennedini sirtdan hibsga oldi. Bu haqda TASS xabar bermoqda.
Ayni paytda Kennedi xalqaro qidiruvga berilgan. Advokatlar hibsga olish qarorini bekor etishga harakat qildi, ammo Moskva shahar sudi ularning shikoyatini rad etib, qarorni o‘z kuchida qoldirdi. Apellyatsiya bo‘yicha sud majlisi yopiq tarzda o‘tkazildi.
U yollanma askarlikda ayblanmoqda, bu jinoyat uchun yetti yildan o‘n yilgacha ozodlikdan mahrum qilish jazosi nazarda tutilgan. Avvalroq mashhur siyosiy sulola vakilining o‘zi 2022-yilda Xarkov viloyatida «Xalqaro legion» safida Ukraina Qurolli Kuchlari tomonida yashirincha jang qilganini tan olgan edi.
Jon Fitsjerald Kennedi (1917–1963) - amerikalik davlat arbobi, AQSh 35-prezidenti (1961–1963). Demokratik partiya vakili. Sovuq urush davridagi asosiy rahbarlardan biri; u Karib dengizi inqirozini boshdan kechirgan. 1963-yil 22-noyabrda Dallasda o‘ldirilgan.
