Prezident Shavkat Mirziyoyevga 13-avgust kuni «Yangiyo‘l tajribasi» asosida hududlarda iste’molchilarni yonilg‘i-energetika resurslari bilan barqaror ta’minlash, energiya samaradorligini oshirish, tarmoqlardagi yo‘qotishlar va debitorlik qarzdorligini kamaytirish bo‘yicha amalga oshirilgan ishlar yuzasidan axborot berildi.
Avvalroq mazkur tajriba asosida har bir hududdan bittadan tanlab olingan 14 ta tumanda namunaviy tizim yaratish vazifasi belgilangan edi. Ishlar «mahallabay» tashkil etilib, 916 ta mahalla, 832 mingta xonadon, 49 mingta tadbirkorlik sub’yekti va 2,2 mingdan ortiq ijtimoiy soha ob’yekti qamrab olindi.
Har bir mahalla bo‘yicha energetik pasport va energiya resurslariga talab balansi shakllantirildi. Natijada 265 ta mahallada 60 megavatt elektr quvvati, 42 ta mahallada esa yiliga 47 million kub metr tabiiy gaz taqchilligi mavjudligi aniqlandi. Shu bilan birga, 207 ta mahallada quvvat zaxirasi borligi ma’lum bo‘ldi.
O‘rganishlar davomida 14 ta tumanda 5 ming 695 ta transformator, 6,9 ming kilometr elektr tarmog‘i, 242 kilometr gaz tarmog‘i va 404 ta gaz taqsimlash qurilmasi ta’mirtalab ekani aniqlangan.
Hozirga qadar 441 ta transformator, 1 ming 134 kilometr elektr tarmog‘i, 88 kilometr gaz tarmog‘i hamda 92 ta gaz taqsimlash qurilmasi ta’mirlangan.
Hisob-kitoblarga ko‘ra, kelgusi besh yilda mazkur tumanlarda energiya resurslariga talab 49 foizga oshishi kutilmoqda. Shu bois aholi va tadbirkorlarni energiya resurslari bilan barqaror ta’minlashga qaratilgan besh yillik dastur ishlab chiqildi.
Dasturga muvofiq, 721 ta mahallada 2 ming 261 ta transformator va 7 ming 449 kilometr elektr tarmog‘i yangilanadi. Shuningdek, 200 ta mahallada 313 ta gaz taqsimlash qurilmasi va 327 kilometr gaz tarmog‘ini yangilash belgilangan.
Ushbu ishlar natijasida hududlarda qo‘shimcha 1 ming 300 megavatt o‘tkazuvchanlik quvvati yaratilishi rejalashtirilmoqda.
Prezident 14 ta tumanda qo‘llangan yondashuvni respublikaning barcha tumanlarida joriy etish zarurligini ta’kidladi. Mutasaddilarga barcha hududlarda ishlarni «mahallabay» tashkil etish, energetik pasportlar va energiya iste’moli balansini shakllantirish, tarmoqlar holatini manzilli o‘rganish hamda aniqlangan muammolarni bosqichma-bosqich bartaraf etish bo‘yicha topshiriqlar berildi.
