13-avgust kuni qabul qilingan O‘RQ–1164-sonli qonun bilan ayrim qonun hujjatlariga o‘zgartirish va qo‘shimchalar kiritildi.
Oila kodeksiga kiritilgan o‘zgartishlarga ko‘ra, bolaga otasining ismi familiya sifatida berilishi mumkin. Shuningdek, ota yoki ona tomonidan milliy an’analarga muvofiq bobosining ismi bo‘yicha ham familiya berishga ruxsat etiladi.
Avval amaldagi Oila kodeksida otaning ismini bolaga familiya sifatida berish nazarda tutilmagan edi.
Qonun bilan «Arxiv ishi to‘g‘risida»gi qonunga ham qator qo‘shimchalar kiritildi. Unga muvofiq, elektron arxivlar hamda nodavlat arxivlarni tashkil etish tartibi belgilandi.
Elektron arxivlar uchun apparat-dasturiy ta’minot, hujjatlarni raqamlashtirish vositalari va dasturlari mavjud bo‘lishi talab etiladi. Shuningdek, arxiv hujjatlarini qidirish, boshqarish va ularga ishlov berish imkoniyati yaratilishi kerak.
Bundan tashqari, elektron shakldagi hujjatning asl arxiv hujjati bilan bir xilligini ta’minlash, axborot xavfsizligi va kiberxavfsizlik talablariga rioya qilish belgilandi.
Qonunga ko‘ra, Milliy arxiv fondining davlatga tegishli bo‘lmagan qismiga kiritilgan hujjatlar hamda davlat mulki hisoblanmaydigan boshqa arxiv hujjatlarini jamlash, hisobga olish, saqlash va ulardan foydalanish uchun nodavlat arxivlar tashkil etilishi mumkin.
Shuningdek, Adliya vazirligining arxiv ishi sohasidagi vakolatlari aniq belgilab berildi.
Qonun rasmiy e’lon qilingan kundan e’tiboran kuchga kiradi.
