«Oila va gender» ilmiy-tadqiqot instituti Oʻzbekistonda tugʻilish koʻrsatkichlarining 2050-yilgacha boʻlgan uzoq muddatli prognozini eʼlon qildi.
Tadqiqot «Ichki va tashqi migratsiyaning demografik jarayonlar va oila institutiga uzoq muddatli taʼsirini baholash» ilmiy loyihasi doirasida amalga oshirilgan.
Prognoz natijalariga koʻra, mamlakatda tugʻilishlar soni kelgusi yillarda oʻsishda davom etadi. Xususan, 2030-yilda 892,7 ming nafar, 2040-yilda 1 mln 16,1 ming nafar, 2050-yilga kelib esa 1 mln 234,1 ming nafar bola tugʻilishi kutilmoqda.
Shu tariqa, 2050-yilda tugʻilishlar soni 2025-yilga nisbatan 354,5 ming nafarga yoki 40,3 foizga koʻpayishi prognoz qilingan.
Hududlar kesimida eng yuqori oʻsish Toshkent viloyatida kutilmoqda - 62 foiz. Keyingi oʻrinlarda Toshkent shahri - 61 foiz, Andijon viloyati - 48,6 foiz, Samarqand viloyati - 43,3 foiz va Namangan viloyati - 42,4 foiz bilan qayd etilgan.
Shu bilan birga, tugʻilishning umumiy koeffitsiyentida oʻrta muddatli davrda biroz pasayish, keyinchalik esa barqaror oʻsish tendensiyasi kuzatilishi kutilmoqda.
Respublika boʻyicha tugʻilishning umumiy koeffitsiyenti 2030-yilda har ming aholiga 21,2 nafarni, 2040-yilda 20,8 nafarni, 2050-yilda esa 21,9 nafarni tashkil etishi prognoz qilingan.
2050-yilda bu koʻrsatkich eng yuqori boʻlishi kutilayotgan hudud Surxondaryo viloyati boʻlib, u yerda har ming aholiga 24,7 nafar tugʻilish prognoz qilinmoqda. Qashqadaryo viloyatida bu koʻrsatkich 23,8 promille, Namangan va Samarqand viloyatlarida 23,1 promilledan, Andijon viloyatida 22,9 promille, Toshkent shahrida esa 22,3 promilleni tashkil etishi kutilmoqda.
Mutaxassislar tugʻilishlar sonining prognoz qilinayotgan oʻsishi kelgusi yillarda taʼlim, sogʻliqni saqlash, maktabgacha taʼlim, uy-joy, ijtimoiy xizmatlar hamda mehnat bozori infratuzilmasiga boʻlgan ehtiyojni ham oshirishini qayd etgan.
Shu bois demografik oʻzgarishlarni oldindan baholash davlat resurslarini samarali taqsimlash, hududlarni kompleks rivojlantirish va inson kapitaliga investitsiyalarni strategik rejalashtirishda muhim ahamiyat kasb etadi.
