17–23-avgust kunlari qishloq xo‘jaligi uchun o‘tgan haftaga nisbatan biroz yengilroq agrometeorologik sharoit shakllanadi. Biroq kunduzgi yuqori harorat, kuchli shamol va ayrim hududlarda chang-to‘zonlar ekinlar va chorva uchun issiqlik hamda namlik stressi xavfini saqlab qoladi.
Hafta davomida kutilayotgan ob-havo bilan iqlimshunos Erkin Abdulahatov tanishtiradi.
Hafta boshida shimoliy-g‘arbiy hududlardan salqinroq havo kirib kelishi natijasida shimolda harorat pasayadi, keyinchalik bu salqinlik respublika hududlarining boshqa qismiga ham tarqaladi. Kunduzlari aksariyat hududlarda +35…+38 daraja, janubda esa ish kunlari +40…+41 darajagacha issiqlik saqlanishi mumkin. Dam olish kunlarida haroratning +31…+36 darajaga tushishi ekinlar va chorva uchun issiqlik yuklamasini biroz kamaytiradi.
Tungi haroratning +17…+20 darajagacha pasayishi ayniqsa paxta, sabzavot-poliz va bog‘dorchilik ekinlari uchun sutkalik issiqlik stressidan keyin tiklanish sharoitini yaxshilaydi. Biroq yuqori kunduzgi harorat va bug‘lanishning davom etishi tufayli sug‘orishga bo‘lgan ehtiyoj hali yuqori bo‘lib qoladi. Sug‘orishni kunning salqin vaqtlariga to‘g‘irlash, tuproq namligini nazorat qilish va suvni tejamli berish muhim.
Hafta boshida shimol, cho‘l va janubiy hududlarda kuchli shamol va chang-to‘zonlar kuzatilishi mumkin. Bu ochiq maydonlarda tuproqning tez qurishi, yosh nihollarga mexanik ta’sir va meva-sabzavot mahsulotlarining changlanishiga olib kelishi ehtimolini oshiradi. Chorvachilikda esa kunduzgi issiqlik hali saqlanib turgani uchun soyali joylarni, toza ichimlik suvi va shamollatish sharoitlarini ta’minlash muhim.
Umuman, hafta qishloq xo‘jaligi uchun o‘tgan haftaga nisbatan yengilroq, ammo hali issiqlik xavfi to‘liq ortda qolmagan davr bo‘ladi. Asosiy agrometeorologik ustunlik – tungi salqinlikning kuchayishi; asosiy xavflar esa janubda saqlanadigan yuqori harorat, yuqori bug‘lanish va shamol-chang jarayonlaridir.
