Prezidentning «Aholiga muddatli to‘lov xizmatlari ko‘rsatilishini takomillashtirish chora-tadbirlari to‘g‘risida»gi qaroriga ko‘ra, muddatli to‘lov xizmatlarini ko‘rsatish shartnomalari bir qator talablarga muvofiq bo‘lishi lozim.
Xususan, muddatli to‘lov xizmati ob’yektining qiymati bazaviy hisoblash miqdorining 250 baravaridan oshmasligi belgilandi.
Shuningdek, shartnomada muddatli to‘lov xizmati operatorining komissiya (ustama) to‘lovlari hamda tovar, ish yoki xizmatning yakuniy qiymatiga kiritiladigan boshqa to‘lovlar alohida ko‘rsatilishi shart.
Muddatli to‘lov xizmati bo‘yicha asosiy qarzdan tashqari barcha to‘lovlar, jumladan, vositachilik haqlari, neustoyka, jarima, penya va boshqa javobgarlik choralarining umumiy miqdori yiliga muddatli to‘lov miqdorining yarmidan ko‘p bo‘lishi mumkin emas.
Iste’molchi muddatli to‘lov summasini istalgan vaqtda to‘liq yoki qisman qo‘shimcha jarima, penya va komissiyalarsiz muddatidan oldin so‘ndirish huquqiga ega bo‘ladi.
Bundan tashqari, muddatli to‘lov xizmatini ko‘rsatish shartnomasi bo‘yicha iste’molchi majburiyatining eng ko‘p muddati shartnoma tuzilgan kundan boshlab 12 oy etib belgilandi.
Shu bilan birga, 2027-yil 1-yanvardan qiymati BHMning 3 baravarigacha bo‘lgan tovar iste’mol krediti shartnomalari va ularning ijro etilishi holati haqidagi ma’lumotlarni kredit byurolariga taqdim etish talab qilinmaydi.
